काठमाडौँ । नेपाली कांग्रेसकी सांसद पार्वता डिसी चौधरीले कृषिमन्त्रीका कारण सरकार र नेपाली कांग्रेको बेइज्जत भएको आरोप लगाएकी छन् ।
प्रतिनिधिसभाको आजको बैठकमा उनले किसानहरुले मल नपाएर छटपटाइरहेको बेला कृषि तथा पशुपन्छी विकासमन्त्री महिन्द्रराय यादव भारत भ्रमणमा निस्किएको बताइन् । यसबाट सरकार र नेपाली कांग्रेसको बेइज्जती भएको उनको भनाइ थियो ।
संसद्मा नेकपा (एमाले) ले दर्ता गरेको रासायनिक मल अभावसम्बन्धी अत्यन्त जरुरी सार्वजनिक महत्वको प्रस्तावमाथि छलफलमा भाग लिँदै उनले सत्तारुढ गठबन्धनले राम्रो मान्छेलाई मन्त्री नबनाएको जिकिर गरिन् ।
हिजो प्रधानमन्त्रीले चाहेर पनि एक्लै काम गर्न नसकेको बताउनुभएको स्मरण गराउँदै उनले यस्ता काम गर्न नसक्ने मन्त्रीका कारण प्रधानमन्त्री र नेपाली कांग्रेसका सभापतिले काम गर्न नसक्नुभएको बताइन् । उनले भनिन्, “बेइज्जत त हाम्रै कांग्रेसको हुन्छ नि, नेतृत्व हाम्रो छ ।”
