सुर्खेत । नेकपा (एकीकृत समाजवादी) का अध्यक्ष माधवकुमार नेपालले प्रधानमन्त्रीको प्रलोभनमा नपर्ने बताउनुभएको छ । सुर्खेतमा आयोजना गरिएको स्थानीय तहको निर्वाचनमा पार्टीका नवनिर्वाचित जनप्रतिनिधि तथा कार्यकर्ताको प्रशिक्षण कार्यक्रममा उहाँले प्रधानमन्त्रीका लागि आफू कुनै पनि प्रकारको प्रलोभन र लालचमा नपर्ने बताउनुभयो ।
नेकपा (माओवादी केन्द्र) का अध्यक्ष पुष्पकमल दाहाल प्रचण्डले एक कार्यक्रममा प्रधानमन्त्रीको अफर आएको बताउनुभएको भन्दै अध्यक्ष नेपालले भन्नुभयो, “मैले उहाँलाई त्यस्तो प्रस्ताव आफूलाई पनि आएको छ भनेर संकेत गरेँ, म प्रधानमन्त्रीका लागि कुनै प्रकारको प्रलोभन र लालचमा पर्ने मान्छे होइन्, यो कार्ड मान्छेलाई मूर्ख बनाउने तरिका मात्र हो ।”
उहाँले वाम गठबन्धन र नेकपा (एमाले) सँग एकीकरणको चर्चा चले पनि तत्काल यी दुवैको सम्भावना नरहेको बताउनुभयो । उहाँका अनुसार एमालेसँग एकीकरण वा गठबन्धनको सम्भावना छैन ।
