ललितपुर । ललितपुर महानगरपालिकाले स्थानीय सरकार सञ्चालन ऐन, २०६३ अनुसार वडाध्यक्षबाट सम्पादन हुने कार्यहरुको अधिकार वडासचिवहरुलाई प्रत्यायोजन गरेको छ ।
गत वैशाख १५ गतेको निर्णयअनुसार नै वडासचिवहरुलाई अधिकार प्रत्यायोजन गरिएको र निवर्तमान वडाध्यक्षहरुको कार्यावधि जेठ ५ गते सकिएकाले अर्को वडाध्यक्ष निर्वाचित भएर नआएसम्मका लागि वडासचिवहरुलाई अधिकार प्रत्यायोजन गरिएको हो ।
गत वैशाख ३० गते भएको स्थानीय तहको निर्वाचनअन्तर्गत ललितपुर महानगरपालिकाको मतगणना अझै नसकिएको हुनाले वडाध्यक्षले गर्ने काम वडा सचिवहरुले गर्ने गरी अधिकार प्रत्यायोजन गरिएको हो ।
महानगरका प्रमुख प्रशासकीय अधिकृत गणेश अर्यालले सबै वडा सचिवलाई लेखेको पत्रमा सेवाग्राही नागरिकहरुको सेवा प्रवाह प्रक्रियालाई निरन्तरता दिनुपर्ने बाध्यात्मक अवस्था रहेकाले अधिकार प्रत्यायोजन गरिएको उल्लेख गर्नुभएको छ ।
वडा सचिवहरुलाई व्यक्तिगत घटना दर्ता गर्ने, नाता प्रमाणित गर्ने, अत्यावश्यक सिफारिस प्रदान गर्ने, सर्जिमिन मुचुल्का (नक्सा पास, म्याद टाँस) लगायतका काममा रोहवर प्रमाणित गर्ने र वडा तहका अन्य प्रशासनिक कार्यहरु गर्ने गरी अधिकार प्रत्यायोजन गरिएको छ ।
