बैतडी । वामपन्थी आन्दोलनका अग्रणी नेता एवं समाजसेवी पृथ्वीराज अवस्थीको ८४ वर्षको उमेरमा निधन भएको छ । बैतडीको सुर्नया गाउँपालिका–६ शङ्करपुर घर भएका अवस्थी हाल कैलालीको गोदावरीमा बस्दै आउनुभएको थियो । ‘लालटिन बाजे’ का रूपमा समेत परिचित अवस्थीको आज उहाँको बिहान घरमै निधन भएको हो ।
विसं १९९४ मा जन्मिनुभएका समाज परिवर्तनका लागि लामो समयदेखि सङ्घर्ष गर्दै आउनुभएका अवस्थी केही वर्षदेखि अस्वथ रहनुभएको थियो । बैतडीमा वामपन्थी आन्दोलनलाई अघि बढाउन अवस्थीको ठूलो योगदान रहेको छ । यस्तै जातीय विभेद अन्त्यका लागि समेत अवस्थीले ठूलो योगदान पु¥याएको स्थानीयवासीले बताएका छन् ।
विसं २०४६ को परिवर्तनपछि एमालेबाट चुनावसमेत लड्नुभएका अवस्थी पराजित हुनुभएको थियो । उहाँले चुनावताका लगाएको एक भोट एक नोटको नारा धेरै चर्चामा रहेको छ । प्रबल जनसेवा (चतुर्थ श्रेणी) मानपदवीबाट विभूषित हुनुभएका अवस्थीले गोरखा दक्षिणबाहु पनि पाउनुभएको थियो । पृथ्वीराज अवस्थीलाई वैचारिक र निष्ठावान नेताका रुपमा लिने गरिन्छ । उहाँले लामो समयसम्म नागरिक समाज बैतडीको नेतृत्वसमेत गर्नुभएको थियो ।
बैतडी एमालेको पहिलो पुस्ताका थोरै नेतामध्येका एक व्यक्ति अवस्थी पनि हुनुहुन्थ्यो । अवस्थीलगायतका नेताका कारण एमालेको सङ्गठन गाउँ–गाउँसम्म फैलाएपछि यहाँ कम्युनिष्ट आन्दोलन र सङ्गठनले गति लिएको बताइन्छ । सङ्गठन निर्माण र जनजीविकाको सवालमा अवस्थीले जहिल्यै निमुखाका पक्षमा रहेर काम गर्नुभएको थियो । अवस्थीको निधनमा विभिन्न पार्टीका नेता, व्यक्ति र सङ्घसंस्थाले दुःख व्यक्त गर्दै श्रद्धाञ्जलि अर्पण गरेका छन् ।
