चितवन । नेकपा एमालेका अध्यक्ष केपी शर्मा ओलीले चितवनका नेपाली कांग्रेसका कार्यकर्ताहरुलाई गठबन्धनमा रहेर अर्को पार्टीको चुनाव चिन्हमा भोट हाल्नुपर्ने अवस्था आएको बताउँदै गीतसँग जोडेर कटाक्ष गरेका छन् ।
चितवनको चुनावी सभालाई सम्बोधन गर्दै ओलीले भने ‘म कांग्रेसका नेताहरुलाई भन्न चाहन्छु, कांग्रेसका कार्यकर्ताहरु त बिचरा कति मुटु धड्किएको होला, कति पिर परेको होला । प्रकाश सपुतको गीत जस्तै पिर बिसाउने ठाउँ नै पाइनँ भनेर । कांग्रेसका कार्यकर्ताहरुले कहाँ पिर बिसाउने ? छाती समातेर बस्नुभएको होला । कांग्रेसका नेताहरुले प्रधानमन्त्री पदका लागि पार्टी सिध्याउँदैछन् । के हेरेर बसेछन् कार्यकर्ता ?’
यस्तै, अध्यक्ष ओलीले देश बनाउने अगुवाई एमालेले गरेको बताउँदै कांग्रेसले गठबन्धनका नेताहरु पटक पटक प्रधानमन्त्री बनेपनि कुनै कामहरु नगरेको आरोप समेत लगाए ।
