काठमाडौं । इस्लाम धर्मावलम्बीहरूको ठूलो पर्व इद उल फित्र (इद) आज हर्षोल्लासका साथ धुमधामले बनाएका छन् । पवित्र महिना रमजानको एक महिनाको लामो कठोर व्रत (रोजा)पछि आज बिहान ‘इद उल फित्र’ इदको सामूहिक नवाज पढिएको थियो । प्रार्थना सकेपछि एकापसमा अङ्कमाल गर्दै इदको शुभकामना आदानप्रदान भएको थियो ।
आत्मसंयम र शुद्धीका लागि नवौँ महिनामा एक महिनाभरि रोजा बसेर दशौँ महिनाको पहिलो दिन इद मनाउने चलन रहेको नेपाल मुस्लिम संघका सस्थापक अध्यक्ष एबं नेपाली कांग्रसका केन्द्रीय सदस्य अव्दुल सत्तारले जानकारी दिनुभयो ।
उहाँका अनुसार रमजान सकिएको खुसीयालीमा इदगाहमा जम्मा भएर सामूहिकरूपमा प्रार्थना गरी एकापसमा शुभकामना साटासाट गर्नेसमेत प्रचलन छ ।
‘इद उल फित्र’ इदका अवसरमा प्रत्येक मुस्लिम समुदायको घरघरमा सेवाइ, जर्दा पुलाउजस्ता विशेष पकवान पकाई आफू खाने र आफन्तका घरमा पठाउने प्रचलनसमेत रहेका कारणले यसलाई मिठी इद पनि भन्ने गरिन्छ ।
रोजा सूर्योदय हुनुभन्दा अघिदेखि सूर्यास्तसम्म चल्ने र यस महिनामा गरिब तथा विपन्नलाई आर्थिक सहयोगलगायत अन्य दान दिने चलन रहेको छ ।
