काठमाडौं । भारतीय प्रधानमन्त्री नरेन्द्र मोदी यही जेठ २ गते लुम्बिनी आउँदै छन् । आगामी जेठ २ गते परेको बुद्ध पूर्णिमाको अवसरमा उहाँ लुम्बिनी आउन लाग्नुभएको हो । उहाँको यो नेपाल भ्रमणका क्रममा काठमाडौँ आउने कार्यक्रम भने तय नभएको बताइएको छ ।
भारतीय प्रधानमन्त्री मोदी १६ मे (२ जेठ) भन्दा अगाडि नेपाल भ्रमणमा जाने योजना सरकारले बनाइरहेको भारतीय पत्रिका द हिन्दूले हिजोको संस्कारणमा जनाएको थियो ।
स्रोतलाई उद्धृत गर्दै हिन्दूले लेखेको छ, ‘सन् २०१९ मा पुनः प्रधानमन्त्री निर्वाचित भएपछि मोदीको यो पहिलो नेपाल भ्रमण हुनेछ । मोदी बुद्ध पूर्णिमाको अवसरमा लुम्बिनीमा हुने समारोहमा सहभागी हुन आउन लागेका हुन् । त्यस कार्यक्रममा प्रधानमन्त्री शेरबहादुर देउवा पनि सहभागी हुनेछन् ।
त्यस कार्यक्रममा नै प्रधानमन्त्री देउवाले आफ्ना भारतीय समकक्षी मोदीसँग भेटवार्ता गर्नुहुने कार्यक्रम तय भएको बताइएको छ । आफू भारत भ्रमणमा गएका बेला करिब एक महिना अघि मात्रै देउवाले मोदीलाई आमन्त्रण गरेका थिए ।
नेपाल र भारतीय अधिकारीहरुले मोदीको भ्रमणको चाँजोपाँजो मिलाइरहेका छन् । स्रोतका अनुसार देउवा र मोदी मायादेवी मन्दिरमा दीप प्रज्ज्वलन समारोहमा सहभागी हुनेछन् । उनी दिल्लीबाट कुशीनगर अन्तर्राष्ट्रिय विमानस्थलमा आउने र त्यहाँबाट हेलिकप्टर चढेर लुम्बिनी ओर्लिने छन् ।
मोदी काठमाडौँ आउने कार्यक्रम भने नरहेको परराष्ट्र स्रोतले जनाएको छ । तर उहाँ दोस्रो कार्यकालका लागि प्रधानमन्त्री चयन भएपछि नेपाल भ्रमणमा नआएकाले काठमाडौँसम्म ल्याउन सकिन्छ कि भन्ने प्रयासमा नेपाल सरकार लागेको स्रोतले जनाएको छ ।
