काठमाडौँ । सदर चिडियाखाना जावलाखेलमा रहेका जनावरको अभिभावकत्व ग्रहण गर्न सर्वसाधारणमा रुचि देखिएको छ । तत्कालीन वन तथा वातावरणमन्त्री पे्रेम आलेले एउटा हात्तीको आहारका लागि एक लाख रुपियाँ उपलब्ध गराएर यस कार्यको सुरुवात गर्नुभएको थियो । त्यसपछि तत्कालीन प्रधानमन्त्री केपी शर्मा ओलीले एउटा गैँडाको अभिभावकत्व ग्रहण गर्नुभएको थियो । त्यसयता देश–विदेश गरी ६० जनाभन्दा व्यक्तिले चिडियाखानामा पालिएका जनावरको आहार तथा पालनपोषणका लागि सहयोग उपलब्ध गराइसकेका छन् ।
सदर चिडियाखानाका प्रमुख डा. चिरञ्जीवी पोखरेलका अनुसार कोरोनाका कारणले चिडियाखाना हेर्न आउनेको सङ्ख्या घटेसँगै आम्दानी घटेकाले जनावरको पालनपोषणमा समस्या सिर्जना भएको छ ।
डा। पोखरेलका अनुसार केही समयअघि प्रधानन्यायाधीश चोलेन्द्रशमशेर राणाले पनि चिडियाखानामा रहेका दुई बाघको अभिभावकत्व ग्रहण गर्नुभएको छ । राणाले बाघ प्रताप र बघिनी जगतीलाई आधा आधा रकम गरी कुल एक लाख रुपियाँ प्रदान गर्नुभएको छ ।
त्यसैगरी, जावलाखेल ग्रुप अफ इन्डस्ट्रिजले एक हात्तीको आहारका लागि वर्षभरिको खर्च १५ लाख रुपियाँ उपलब्ध गराएको छ । डा। पोखरेलले भन्नुभयो, “यो क्रम जारी रहेको छ । देश–विदेशमा रहेका दान गर्ने सयौँ महानुभावले यहाँको समस्या सोधेर, बुझेर सहयोग गर्ने प्रतिबद्धता व्यक्त गर्नुभएको छ र सोहीअनुसार सहयोग गर्ने क्रम जारी रहेको छ ।” समाजसेवी समीरमणि दीक्षितले १९ जनावरको अभिभावकत्व ग्रहण गर्नुभएको चिडियाखानाका सूचना अधिकृत लीना चालिसेले जानकारी दिनुभयो ।
अभिभावकत्व ग्रहण गर्नेले एक वर्षका लागि उक्त जनावरलाई खानपान र स्वास्थ्य संरक्षण दिनुपर्ने व्यवस्था चिडियाखानाले गरेको छ । यो व्यवस्थापछि चिडियाखानाले नै जनावरका लागि आवश्यक खानपान र संरक्षण व्यवस्था गर्छ, यसबारे अभिभावकलाई बेलाबेलामा जानकारी पनि दिन्छ । चिडियाघरमा जलचर, उभयचर, सरिसृपसहितका हिंस्रक जनावर संरक्षणमा रहेका छन् ।
सूचना अधिकृत चालिसेका अनुसार संस्थागत वार्षिक १५ लाख रुपियाँ, साधारण साढे दुई लाख र सर्वसाधारणका लागि न्यूनतम वार्षिक ७५ हजार रुपियाँसम्मको खर्च गर्न सकिने गरी जनावरको अभिभावकत्व ग्रहण लिन÷दिन सकिने व्यवस्था गरिएको छ । विश्व वन्यजन्तु दिवस सन् २०२१ को मार्च ३ तारिखदेखि यो कार्यक्रम घोषणा गरिएको थियो । काकातुवा, बाज, चील, हुँडार, सर्प, भुँडिफोर र थरीथरीका माछा तथा मयूरलगायतका पन्छी जनावर यहाँको आकर्षण छ ।
बागमती प्रदेश सभा सदस्य नरोत्तम वैद्यले जीवजन्तुको संरक्षणमा चिडियाखानाले गरेको यो कार्य सह्रानीय भएको बताउनुभयो । गैँडा, जलगैँडा, हुँडार, भुँडिफोरलगायतका जनावरको अभिभावकत्व ग्रहण गर्न इच्छुकले चासो दिइरहेको उहाँले जानकारी दिनुभयो । वि।सं। १९८९ मा स्थापना भएको चिडियाखानामा कुल ८७० पशुपन्छी जनावर रहेका छन् ।, समाचार गोरखापत्र दैनिकमा प्रकाशित छ ।
