काठमाडौँ । काठमाडौँ उपत्यकाका कम्तीमा पनि ७५ प्रतिशत लक्षित बर्गका नागरिकले कोरोना भाइरसका विरुद्धको खोप लगाएका छन् । स्वास्थ्य तथा जनसंख्या मन्त्रालयले हिजो सार्वजनिक गरेको एक तथ्यांकमा सो कुरा जनाइएको छ ।
मन्त्रायका सहप्रवक्ता डा समीरकुमार अधिकारीले हालसम्म उपत्यकामा पहिलो मात्रा ७६ प्रतिशत र पूर्ण मात्रा ७३ प्रतिशतले खोप लगाएको जनाकारी दिए । डा अधिकारीका अनुसार काठमाडौँ जिल्लामा पहिलो मात्रा ७८ प्रतिशत र पूर्णमात्रा ७४ प्रतिशत जनसंख्याले खोप लगाइसकेका छन् । काठमाडौँमा खोप लगाउने १५ लाख ६३ जना लक्षित रहेका थिए ।
यस्तै भक्तपुरमा पहिलो मात्रा ६३ प्रतिशत र पूर्णमात्रा ७५ प्रतिशत, ललितपुरमा पहिलो मात्रा ७६ प्रतिशत र पूर्ण मात्रा ६९ प्रतिशतले खोप लगाइसकेका छन् । सरकारले असोज मसान्तभित्र ३३ प्रतिशत, पुस मसान्तसम्म दुई तिहाइ र चैत मसान्तभित्र सबै लक्षित जनसंख्यालाई खोप लगाउने लक्ष्य लिएको छ ।
गत असार २९ गते आफू प्रधानमन्त्रीमा नियुक्ति भएसँगै शेरबहादुर देउवाले आफ्नो पहिलो प्राथमिकता नागरिकलाई महामारीबाट बचाउने र त्यसका लागि कोरोनाको खोप सबै लक्षित बर्गमा पुर्याउने बताएका थिए । उनी प्रधानमन्त्री हुने समयमा नेपाल कोरोनाको महामारीले आक्रान्त थियो । त्यस्तो समयमा पनि केपी ओलीको सरकारले खोपको सुश्चित गर्न सकेको थिएन ।
नेपाल सरकारले एड्भान्स रकम दिइसकेको बताइरहेको थियो तर भारतले भने खोप दिन सकेको थिएन । यता नागरिकले एस्ट्राजेनेका खोप लगाउन नपाएको चार महिना पुगिसकेको थियो तर सरकार भने भारतले खोप नदिएको भनेर मात्र प्रचार गरेको थियो । त्यस्तो अवस्थामा नागरिकले भने खोप कहिले आउँछ भनेर सामाजिक सञ्जालमा ट्रोल नै बनाएका थिए । प्रधानमन्त्री देउवाले आफ्नो कार्यभार सम्हालेपछिको पहिलो प्रतिक्रियामा खोप, खोप, खोप भनेर कोरोना विरुद्धको खोपलाई पहिलो प्राथमिकता दिएका थिए ।
त्यसलगत्तै सरकारले आफ्ना कार्यक्रमहरु महामारीको भेलबाट नागरिकलाई बचाउने लक्षित गर्यो र भारत र चीनसँग खोपका लागि लबिङ भयो । उता अमेरिका र जापानबाट पनि नेपाललाई खोप प्राप्त भयो । यसरी कतिपय कोभ्याक्स अन्तर्गतको कतिपय खरिद गरेर र कतिपय विभिन्न देशसँग अनुदानमा खोप उपलब्ध भयो । यसरी अहिले नेपाली नागरिकले सजिलै खोप पाइरहेका छन् । दिनमा कम्तीमा पनि एक लाख नागरिकले अहिले कोरोना विरुद्धको खोप लगाइरहेका छन् ।
राजधानी उपत्यका धेरै जनासङ्ख्या भएको, प्रायः देशभरका मानिसहरुको मिश्रित बस्ती रहेको स्थान हो । बढी जनसंख्या रहेको यो उपत्यकामा ७५ प्रतिशत नागरिकलाई खोप लगाउनु भनेको सामान्य कुरा होइन । नागरिकका अरु धेरै अधिकारमध्येको सबैभन्दा महत्वपूर्ण अधिकार भनेको बाँच्न पाउनु हो । त्यसैले सरकारले प्राप्त गरेको यो उपलब्धिलाई महत्वपूर्ण रुपमा लिनुपर्ने हुन्छ ।
सरकारले यही असोज मसान्तभित्र ३३ प्रतिशत जनसख्यालाई कोरोना भाइरसविरुद्धको खोप लगाउने लक्ष्य राखेको छ । यस्तै पुसमा दुई तिहाइ र चैत मसान्तसम्म सबै लक्षित नागरिकलाई खोप लगाउने सरकारको तयारी रहेको छ । प्रधानमन्त्री शेरबहादुर देउवाले नागरिकलाई खोप लगाउने कामलाई आफूले पहिलो प्राथमिकतामा राखेको बताउँदै पनि आउनुभएको छ ।
खोप कार्यक्रमलाई प्रभावकारी बनाउन जिल्ला जनस्वास्थ्य कार्यालय काठमाडौँले जिल्लाका १४५ खोप केन्द्रबाट कोरोनाविरुद्धको खोप प्रदान गर्दै आइरहेको छ । अहिले काठमाडौँ उपत्यकामा ४० वर्षमाथिका सबै र १८ वर्षमाथिका खोप लगाउन छुटेका विद्यार्थीले ती खोप केन्द्रबाट खोप लगाइरहेका छन् । यसअघि रोकिएको १२ कक्षाको जाँच पनि विद्यार्थीलाई खोप लगाएर पुनः सुचारु भयो र परीक्षा पनि सकियो ।
