काठमाडौँ । सत्ता साझेदार दलहरुका तर्फबाट काठमाडौँ महानगरपालिकाको मेयर पदमा नेपाली कांग्रेसकी सिर्जना सिंह उम्मेदवार बन्ने करिब निश्चि भएको छ ।
सत्ता साझेदार दलबीच मङ्गलबार बसेको बैठकमा कांग्रेस नेताहरुले सिंहलाई काठमाडौंमा मेयरको उम्मेदवार उठाउने बताएका थिए ।
विधानतः महानगर कार्यसमितिले सिफारिस गरेका नामबाट केन्द्रीय संसदीय समितिले उम्मेदवार छनोट गर्ने व्यवस्था रहे पनि महानगर कार्यसमितिले आकांक्षीका नाम केन्द्रलाई सिफारिस नगर्दै सिंहलाई उम्मेदवार बनाउन नेताहरु सहमत भएका हुन् ।
काठमाडौँ कांग्रेसको राजनीतिमा कांग्रेस नेता प्रकाशमान सिंहको पकड रहेकाले उनले इच्छा गरेको व्यक्ति काठमाडौँको मेयरमा उम्मेदवार हुँदै आएका छन् । सिर्जना सिंह प्रकाशमान सिंहकी पत्नी हुन् । त्यसैले सिर्जना काठमाडौँको मेयरमा उम्मेदार हुने करिब निश्चित भएको हो ।
सिंहले २०३६ सालदेखि सक्रिय राजनीति सुरु गरेकी थिइन् । उनी २०३६ सालमा गोरखाको महिला संघको अध्यक्ष बनेकी थिइन् । उनी त्यसपछि महाबौद्ध क्याम्पसमा २०३८ सम्मको अवधिमा नेविसंघको इकाइ सभापति बनेकी थिइन् । त्यसै वर्ष शंकरदेव क्याम्पसको स्ववियु निर्वाचनबाट कोषाध्यक्ष बनिन् ।
