काठमाडौं, नेपाली कांग्रेसका नेता चन्द्र भण्डारीले केन्द्रीय समितिको निर्णय बिपरित केही नेताहरुले गठबन्धनका नाममा गरेको निर्णय मान्न बाध्य नहुने बताउनु भएको छ । न्यूजपोलार संग नेता भन्नुभयो “स्थानीय तहमा जबर्जस्ती गठबन्धन र बहुलट्ठी भागबन्डाले पार्टीलाई ठूलो घाटा लाग्छ, पार्टीले नचिनेको सयन्त्रले गरेको भनिएको निर्णय बाध्यकारी होईन ।”
उहाँले भन्नुभयो काठमाडौंमा पाँच जना नेता बसेर गरिएको क्राइटेरिया जनताले कसरी मान्ने ?जहाँ गठबन्धन आवश्यक छैन, त्यहाँ जबर्जस्ती किन लाद्ने ? यस्तो क्रियाकलापले कांग्रेसको एउटा तप्का निराश हुन्छ, पार्टी छाडेर जान्छन् । त्यसैले नेताहरुले बहुलट्ठी निर्णय लागू हुन्छ भन्ने छैन ।
कांग्रेस नेता भण्डारीले भन्नुभयो “आफ्नो पार्टीभित्रै मिल्न नसक्ने अनि अरुको पार्टीसँग कसरी मिल्ने ? मिलेर जान त सकिएला तर अरुको अधिकार हनन गर्न मिल्दैन ? माथिबाट आदेशलाई निर्मूल गरेर जान लोकतन्त्र ल्याएको होइन र ?”
नेता भण्डारीले भन्नुभयो कार्यकर्तालाई सन्तुष्ट नबनाईकन गरिएको गठबन्धन सफल हुदैन । उहाँले भन्नुभयो , “कांग्रेस कार्यकर्ताले ५ दलको होइन, कांग्रेसको निर्णय मान्ने हो । भरतपुरमा रेणु दाहाल त उठ्नु होला । तर भोट त कांग्रेसले हाल्नुपर्ला नि । आफ्ना कार्यकर्ताहरुलाई सन्तुष्ट नभईकन कसरी गठबन्धन सफल हुन्छ ? यस्तो कुरा शेरबहादुरजी, प्रचण्डजीलाई कसले सम्झाउने ? काठमाडौंको एउटा कोठामा बसेर गरेको बहुलट्ठी भागबन्डा मान्नुपर्छ भन्ने छैन ।”
नेता भण्डारीले “अहिले सबै स्थानीय तहमा जबर्जस्ती गठबन्धनको कुरा आएको छ । त्यसले स्थानीय तहलाई विचलित र अप्ठ्यारोमा पारिदिएको दाबी गर्नुभयो । काठमाडौको कोठे निर्णयले अनावश्यक द्वन्द्व निम्त्याएको भन्दै उहाँले भन्नुभयो यसले सही दिशा सक्दैन , हामीले सिंहदरबारले तल्लो तहलाई चिनेन भनेर स्थानीय तहको व्यवस्था गरेका हौं । स्थानीय तहलाई नै आफ्नो नेतृत्व छनोट गर्न किन नदिने ?”
