काठमाडौ। शुक्रबारदेखि ललितपुरको गोदाबारीको सनराईज सम्मेलन केन्द्रका नेकपा एमालेको विधान महाधिवेशन चलिरहेको छ । ललितपुरको गोदाबरीमा एमालले अबको नीति र सम्भाबित नेतृत्वबारे छलफल गरिरहेको समयमा अन्य दलका नेताहरुको सम्मेलन प्रतिको चासो पनि उत्तिकै रहेको छ । विभिन्न पार्टी त्याग्दै हाल जनता समाजबादीको राष्ट्रिय परिषद् अध्यक्षका हैसियतमा रहेका डा. बाबुराम भट्टराईले एमालेको बिधान महाधिवेशनबारे सामाजिक सञ्जालमा एक स्टाटस पोष्ट गर्नुभयो ।
डा. भट्टराईले ट्विटरमा लेख्नुभयो ‘खड्गप्रसादको कुम्भमेला निभ्ने बेलाको बत्ती हो । लूटको धन फुपूको श्राद्ध गरेर सोझा जनतालाई केही समय भ्रममा पार्न सकिएला तर अन्तमा देशले ठूलो मूल्य चुकाउनुपर्नेछ । नक्कली राष्ट्रवाद, नृजातीय अहंकारवाद, पपुलिज्म र व्यक्ति पूजाको ककटेलले अन्तः स्टालिन, हिटलर र फासीवाद जन्माउने हो । चेतना भया ।’
डा.भट्टराईको स्टाटसप्रति प्रतिक्रिया जनाउदै एमाले नेता बिष्णु रिमालले लेख्नु भएकोछ ‘आँट छ भने यो भन्दा राम्रो देखाउनु बाबुराम जी । के बरबराई रहेको ?’ यसैगरी राजनीतिक बिषयमा टिप्पणी गर्दै आएका जैनेन्द्र जीवनले प्रतिक्रिया दिनुभएको छ ‘यो नृजातीय अहंकार भन्या चाहिँ के हो डा साब ? सबैले बुझ्नेगरी बुंदागत उदाहरण सहित खुलाइदिउँ न । क्रियामा बसेका कृयापुत्री र तिन्लाई पितृकार्य गराउने पन्डितहरुलाई सफाया गर्ने सांस्कृतिक क्रान्तिका छापामारहरुलाई निम्त्याएर महाधिबेशनमा सम्मान गरेको भए नृजातीय अहंकारको अन्त्य हुन्थ्यो हो ? तपाईको नयाँ शक्ति पार्टीको घोषणासभा योभन्दा बढी तामझामपूर्ण र खर्चिलो थियो । सबैजसो प्रमुख पत्रिकाहरुमा ज्याकेट विज्ञापन, सबै प्रचार सामग्रीहरुमा तपाईको मात्र अनुहार, ब्यानरमा ठूलो आकारमा तपाईकै फोटो अंकित, तपाईको बडेमानको कटअफ अर्थात् पुलिज्म र व्यक्तिपूजाको कडा ककटेल । ’
यसैगरी तिलक कोइरालाले भनेका छन् ‘कम्युनिस्ट नामको पसल थापेर जनता झुक्याएर सर्वहारा जातीयता रङ छरेर सामान्ती भन्दै जनता मारेर राजनीति खेति गरेका होइनौ र तिमीले पनि ? धनयुद्ध हो भन्ने जनताले बुझेपछि तिम्रो नयाँ पसल नयाँ शक्तीको तामझाम देखेकै हो, पसल नचलेर अरू पसल चाहार्दै कालो धन जोगाउन सेतो बनाउनुपर्छ भन्ने को ? ’
यसैगरी कमलीकान्त लम्सालले लेख्नुभएको छ ‘नेपाली जनतालाई भ्रम छर्ने कुरा अरूलाई भन्नु भन्दा आफैलाई आत्ममूल्याङ्कनका लागि राख्नुहोस् । अस्ती कथित जनयुद्धको जन परिषद कमाण्डिङ गर्नेवाला, हिजो नयाँ शक्ति पार्टी खडा गरेर अहिले जसपा र लोसपा जस्ता गुटहरूमा रहेका तपाईंको हालत पनि उस्तै बत्ती जस्तै छैन र ? ’
अर्का व्यक्ति कृष्ण घिमिरेले भन्नुभएको छ ‘१० वटा पार्टीमा पोइल जानेले के राजनीतिक कुरा गर्नु ? आफ्नो सिद्धान्त छैन उसैले अरुको कुरा काटेको सुहायन । लुटको धन र भ्रस्टाचारको सम्पती त तपाइहरु जति काङ्ग्रेस र एमालेसँग छैन । हो उनीहरु पनि भ्रस्टाचारमुक्त चै छैनन ।’
डा. भट्टराइको ट्वीटप्रतिका प्रतिक्रिया हुन् यी । तर पनि यी टिप्पणीहरु भने प्रतिनिधिपात्रयुक्त टिप्पणी मात्र हुन् । डा भट्टराईको स्टाटसमाथि अधिकाँस नकारात्मक टिप्पणी नै रहेको छ । न्युन संख्यले मात्र उहाँको स्टाटसलाई समर्थन गरेका छन् । सामाजिक सञ्जालमा सक्रिय रहने भट्टराईले आफ्नो भनाईमाथि आएको टिप्पणी र प्रतिक्रिया त पक्कै पनि हेर्नुभएको होला र आत्मसमिक्षा पनि गर्नुभएको होला ? तर व्यक्तिपूजाको ककटेलले अन्तः स्टालिन, हिटलर र फासीवाद जन्माउने हो भन्दै एमालेप्रति कटाक्ष गर्नुभएका भट्टराईले नयाँ शक्ति पार्टी गठन गर्दाका समयको विज्ञापनको तामझामको एकप्रति हामीले पनि भेटेपछि यो सानो टिप्पणी यहाँ राख्न मन लागेको हो ।
उहाँले त्यतिबेला लगभग सबै राष्ट्रिय दैनिक पत्रिकामा आफ्नो फोटो सहितको ज्याकेट बिज्ञापन छाप्नुभएको थियो । त्यो विज्ञापन हेर्दा लाग्थ्यो कुनै एकजना व्यक्तिको उदयले अब मुलुकमा केही हुँदैछ । तर केही भएन । त्यसैले अरुको आङ्को जुम्रा देख्नुअघि आफ्नो आङमा पनि भैँसी बसेको छ भनेर पनि हेक्का राख्ने कि ? नत्र न यहाँजस्ता सार्वजनिक व्यक्तित्वहरुका हरेक क्रियाकलापका टिकाटिप्पणी गर्ने मान्छेको कमी छ र नत त्यसो गर्नसक्ने नागरिकको विचार अभिव्यक्तिको स्वतन्त्रता नै कसैले रोक्न सक्छ ।
