काठमाडौँ । नेकपा एमालेका उपाध्यक्ष विष्णु पौडेलले नेपाल राष्ट्र बैंकका गभर्नरलाई अर्थमन्त्रीले सचिव र सहसचिव झैँ चलाउन खोजेको आरोप लगाउनुभएको छ ।
‘मुलुकका आर्थिक अवस्थाका सम्बन्धमा’ नेकपा एमालेले आइतबार आयोजना गरेको पत्रकार सम्मेलनमा पूर्वअर्थमन्त्रीसमेत रहनुभएका पौडेलले अर्थमन्त्री जनार्दन शर्माले नेपाल राष्ट्र बैंकको स्वायत्ततामाथि धावा बोलेर राष्ट्र बैंकलाई मन्त्रालयको अधीनको अङ्गका रुपमा व्यवहार गरेको बताउनुभयो ।
सरकारले केन्द्रीय बैंकलाई मौद्रिक नीति ल्याउन र आवश्यकताअनुसार परिमार्जन गर्न पनि रोक लगाएको उहाँको भनाइ थियो । उहाँले राष्ट्र बैंकमाथि हस्तक्षेप गरेकै कारण अहिले मुलुकको आर्थिक अवस्था कमजोर भएको बताउनुभयो ।
उपाध्यक्ष पौडेलले अर्थतन्त्रको कमजोर अवस्थामा सार्थक हस्तक्षेप नगर्ने हो भने नेपाल चाँडै श्रीलङ्काको अवस्थामा पुग्ने चेतावनी दिनुभयो ।
