काठमाडौं । नेपालका प्रथम पूर्वफिफा रेफ्री लव खत्रीको आज (सोमबार) बिहान निधन भएको छ ।
पूर्व खेलाडी समेत रहेका ५० वर्षीय खत्री मर्निङ वाकबाट फर्किएर बाथरुम गएका थिए । बाथरुम छिरेको निकैबेरसम्म पनि बाहिर नआए पछि हेर्दा ढोकामा अचेत अवस्थामा फेला परेका थिए ।
उनलाई उपाचारका लागि मेडिसिटी अस्पताल लगिएकोमा अस्पतालले उनलाई मृत घोषणा गरेको थियो ।
उनले जावलाखेल युथ क्लब, थ्रीस्टार क्लब र फ्रेन्ड्स क्लबबाट फुटबल खेलेका थिए ।
नेपालका सर्वोत्कृष्ट रेफ्री मानिने उनी सन् २०१८ मा उमेर हदका कारण फिफा रेफ्रीबाट निवृत्त भएका थिए ।
