स्थानीय निर्वाचनः झापामा कडा टक्कर, एमाले र काँग्रेस आमनेसामने

बिर्तामोड। स्थानीय निकायको निर्वाचनको मिति नजिकिँदै गर्दा दलहरुबीच तयारी तिब्र रुपमा अगाडि बढेको छ । गत निर्वाचनको मतपरिणामलाई आधार मान्दा झापा जिल्लामा प्रमुख रुपमा नेपाली काँग्रेस र नेकपा एमालेबीच नै मुख्य प्रतिस्पर्धा हुने पक्का देखिएको छ ।

नेकपा एमालेका अध्यक्ष केपी शर्मा ओली, नेकाका महामन्त्री विश्वप्रकाश शर्मा र अर्का कुटिल काँग्रेसी नेता कृष्ण प्रसाद सिटौलाको गृह जिल्ला झापामा चुनावी सरगर्मी तातिएको छ ।

स्थानीय जानकारहरुका अनुसार यस पटक झापामा मुख्यतः नेपाली काँग्रेस, नेकपा एमाले र राप्रपा बीच नै कडा प्रतिस्पर्धा हुनेछ । चुनावी तालमेल भए पनि वा नभए पनि झापामा नेकपा (माओवादी केन्द्र) र माधव नेपाल नेतृत्वको नेकपा (एकीकृत समाजवादी) निकै कमजोर रहेको विश्लेषण गरिएको छ ।

झापामा कूल १५ वटा स्थानीय तह छन् जसमा अर्जुनधारा, कचनकवल, कनकाई, कमल, गौरादह, गौरीगंज, झापा, दमक, बाह्रदशी, बुद्धशान्ति, भद्रपुर, मेचीनगर, बिर्तामोड, शिवसताक्षी र हल्दिबारी नगरपालिका रहेका छन् ।

चुनावी गठजोड

गत निर्वाचनमा देशका प्रमुख पार्टीहरु एक्लाएक्लै चुनाव लडेका थिए । मत परिणामले नेकपा एमाले सबैभन्दा शशक्त रुपमा प्रस्तुत भएको थियो । चुनावमा एमालेले सात वटा प्रमुख र १२ वटा उपप्रमुख जितेर सबैभन्दा ठूलो पार्टी बनेको थियो ।

पराजित भएका स्थानमा पनि झिनो मतान्तरले एमालेका उम्मेदवार पराजित भएका थिए । तर नेकाको उपस्थिति पनि झापामा राम्रै रहेको मान्न सकिन्छ । नेकाले कूल पाँच वटा प्रमुख र २ वटा उपप्रमुख जितेर दोस्रो पार्टी बनेको थियो । तर कतिपय स्थानमा एमालेसँग काँग्रेसका उम्मेदवारहरु झिनो मतान्तरले पराजित भएका थिए ।

उता अप्रत्यासित रुपमा राष्ट्रिय प्रजातन्त्र पार्टीले स्थानीय तहमा विजयी हासिल गर्नुका साथै अरु कतिपय स्थानीय तहमा राम्रै उपस्थिति जनाएको थियो ।

राप्रपाले तीन वटा स्थानीय तहमा प्रमुख तथा एक ठाउँमा उपप्रमुख जितेको थियो ।

तर राष्ट्रिय राजनीतिमा निकै प्रभावशाली ठानिएको नेकपा (माओवादी केन्द्र) भने झापामा निकै कमजोर देखिएको थियो । माओवादीले एउटा पनि स्थानीय निकायमा प्रमुख वा उपप्रमुख जितेको थिएन । एक स्थानमा मात्र उपप्रमुखमा दोस्रो स्थानमा माओवादी थियो ।

यस पटकको अवस्था

अहिलेको चुनावी प्रतिस्पर्धा पनि मुख्य रुपमा तीन दलबीच नै हुने अनुमान गर्न सकिन्छ । यसअघिका हरेक निर्वाचनमा एमालेको राम्रो उपस्थिति रहेकाले पनि एमाले झापामा बलियो छ । एमालेको भोट बैंक माधव कुमार नेपालका कारण केही घट्ने अनुमान गरिए पनि त्यो स्थिति झापामा देखिन्न ।

जानकारहरुका अनुसार एमालेले राजेन्द्र लिङदेनको राप्रपासँग अघोषित तालमेल गर्ने सम्भावना कायमै छ । यदि यस्तो स्थिति उत्पन्न भएमा नेकालाई पनि झापामा निकै कठिन हुने छ भने एमालेलाई अझ फाइदा पुग्नेछ ।

वर्तमान सत्तारुढ गठबन्धनमा आबद्ध दलहरु नेका, माओवादी, नेकपा (एस) र समाजवादी पार्टीले समझदारी कायम गर्न सके एमालेलाई कडा टक्कर दिन सक्नेछन् । एमालेका नेताहरु स्थानीय चुनावमा निकै सक्रियताका साथ जुटिरहेका र उनीहरुले प्रचार अभियानलाई व्यापक बनाएका छन् ।

एमालेबाट चोइटिएको नेकपा (एस) ले चुनावमा खासै प्रभाव नपार्ने एमालेका नेता कार्यकर्ताको भनाई छ । उनीहरु माधव पक्षलाई जुनसुकै अवस्थामा पनि माथि आउन नदिने रणनीतिका साथ कार्य गरिरहेको र त्यसका लागि जस्तोसुकै त्याग गर्न पछि पर्ने छैनन् ।

तर झापाको राजनीतिलाई निजकबाट नियालीरहेका व्यक्तिहरुका अनुसार झापामा माधव नेपाल पक्षधरहरुले प्रमुख वा उपप्रमुखमा उम्मेदवारी दिने सम्भावना कमै छ । सत्ता गठबन्धनले माधव पक्ष र माओवादी केन्द्रलाई पहिले एमालेले निकै मतान्तरमा चुनाव जितेका र एमालेकै प्रभाव क्षेत्रबाट एक वा दुई स्थानबाट चुनाव लडाउने सम्भावना रहेको उनीहरुको भनाई छ ।

क्र.सं.	नगरपालिका	प्रमुख	पार्टी	पाएको मत	पराजित	पार्टी	मत	उपप्रमुख	पार्टी	मत
१	दमक	रोमनाथ ओली	एमाले	10,806	रामकुमार थापा	राप्रपा	7,655	गीता कुमारी पौडेल	एमाले	12,625
२	भद्रपुर	जीवन कुमार श्रेष्ठ	एमाले	11,042	गणेश पोखरेल	नेका	7,215	चन्द्रमाया श्रेष्ठ	एमाले	10,650
३	मेचीनगर	बिमल आचार्य	नेका	20,776	विष्णुप्रसाद प्रसाइ	एमाले	19,192	मिना कुमारी पोखरेल	एमाले	20,016
४	बिर्तामोड	ध्रुव कुमार शिवाकोटी	एमाले	9,112	जल कुमार गुरूङ	नेका	8,217	पवित्रा देवी महतरा	एमाले	10,437
५	कमल	मेनुका काफ्ले	एमाले	8,275	हुकुमसिंह राइ	नेका	8,275	बेनुप्रसाद सिवाकोटी	एमाले	9,418
६	कनकाइ	राजेन्द्र पोखरेल	एमाले	8,416	एकराज उप्रेती	नेका	6,197	मन्जु प्रसाइँ	एमाले	8,576
७	गौरीगंज	बाबुराजा श्रेष्ठ	राप्रपा	3,740	विद्यानन्द राजवंशी	माओवादी केन्द्र	3,353	दीपिन्द्र थापा	नेका	3,414
८	गौरादह	रोहित कुमार साह	नेका	10,308	मदन प्रसाद अधिकारी	एमाले	9,854	गीता भेटवाल	एमाले	10,620
९	झापा	जय नारायण साह	नेका	4,393	गजेन्द्र ताम्ली	एमाले	3,789	कुन्तीदेवी बुढाथोकी	एमाले	3,816
१०	बाह्रदशी	खड्ग प्रसाद राजवंशी	नेका	5,539	लक्ष्मण पाठक	एमाले	5,111	रत्नाकुमारी राजवंशी	नेका	5,453
११	बुद्धशान्ति	रमेश कुमार भुजेल	नेका	7,996	तिलचन पाठक	एमाले	7,353	मिरा भुर्तेल	एमाले	7,457
१२	शिवसताक्षी	चन्द्र कुमार शेर्मा	एमाले	13,439	पर्शुराम ढुंगाना	नेका	8,984	भोज कुमारी नेपाल	एमाले	13,472
१३	हल्दिबारी	रबिन्द्र प्रसाद लिङदेन	राप्रपा	3,943	मंजुदेवी सिटौला	एमाले	3,543	डम्बर बहादुर गिरि	एमाले	4,386
१४	कचनकवल	अन्जरा आलम	राप्रपा	5,816	कालेन्द्र सिंह राजवंशी	नेका	5,353	निमसरी राजवंशी	राप्रपा	5,774
१५	अर्जुनधारा	हरिकुमार राना मगर	एमाले	13,879	हेम प्रसाद खरेल	नेका	9,641	कमला खतिवडा	एमाले	12,831

त्यही कारण पनि झापाको स्थानीय चुनाव निकै रोचक हुनेछ । राजेन्द्र लिङदेन प्रति जनसमर्थन अहिले केही बढेकाले पनि चुनावी परिणाम मिश्रित आउने अनुमान गर्न सकिन्छ ।