काठमाडौँ । किशोर गुरुङ नेतृत्वको गोरक्षा संरक्षण अभियान राष्ट्रिय प्रजातन्त्र पार्टी (राप्रपा)मा समाहित भएको छ । पार्टी अध्यक्ष राजेन्द्र लिङ्देनले पार्टीमा आयोजित एक कार्यक्रममा सो अभियानलाई राप्रपामा समाहित गरेका हुन् ।
यसअघि ज्ञानेन्द्र शाही नेतृत्वको ‘हाम्रो नेपाल हामी नेपाली अभियान’ राप्रपामा समाहित भएको थियो । यसैबीच राप्रपाले राष्ट्रिय युवा मोर्चाको नेतृत्व हेरफेर गरेको छ । नेतृत्वसहित पार्टीको सम्पूर्ण सुरक्षा हेर्नका लागि गठन गरिएको सो मोर्चाको अध्यक्षमा काठमाडौँका सुरज पाण्डेलाई जिम्मेबारी दिइएको छ ।
यसअघि सो मोर्चाका अध्यक्ष रहेका केदार धमला पार्टीको काठमाडौँ महानगर समितिको अध्यक्ष बनेकाले मोर्चाको नेतृत्व परिवर्तनका लागि आग्रह गरिएको थियो । पार्टीले मोर्चालाई आवश्यक कार्ययोजना बनाएर पेश गर्न निर्देशन दिइएको छ ।
राप्रपाले यही चैत २५ गते काठमाडौँमा स्थानीय तहको निर्वाचनालाई केन्द्रीत गरेर आमसभा गर्ने भएको छ । सो आमसभालाई पार्टीको शक्ति प्रदर्शनका रुपमा तयारी गरिरहेको पार्टी प्रवक्ता मोहन श्रेष्ठले बताए ।
