एजेन्सी । १५ औं संस्करणको इन्डियन प्रिमियर लिग (आईपीएल)अन्तर्गत पञ्जाब किंग्सले रोयल च्यालेन्जर्स बैंगलोरलाई ५ विकेटले पराजित गरेको छ ।
टस हारेर पहिले ब्याटिङ गरेको बैंगलोरले २० ओभरमा दुई विकेट गुमाएर २०५ रन बनाएको थियो । जवाफमा पन्जाबले १९ ओभरमा पाँच विकेट गुमाएर २०८ रन बनाएर खेल जित्यो । यस खेलमा कुल २७ छक्का प्रहार गरिएको थियो । बैंगलोरबाट १३ छक्का र पञ्जाबबाट १४ छक्का थिए ।
रोयल च्यालेन्जर्स बैंग्लोरले राम्रो ब्याटिङ गरेको थियो । फाफ डु प्लेसिसको कप्तानी इनिङ्स र अन्तमा दिनेश कार्तिकको आक्रामक ब्याटिङले बैंग्लोरले २० ओभरमा दुई विकेट गुमाएर २०५ रन बनाएको थियो । विराट कोहलीले पनि राम्रो ब्याटिङ गर्दै २९ बलमा एक चौका र दुई छक्काको मद्दतमा ४१ रन बनाएर अविजित रहे । यस्तै, दिनेश कार्तिकले अन्तिममा १४ बलमा ३२ रनको अविजित इनिङ खेले । जसमा तीन चौका र तीन छक्का समावेश थिए ।
टस हारेर पहिले ब्याटिङ गरेको बैंग्लोरले सुस्त सुरुवात गरेको थियो । कप्तान फाफ डु प्लेसिस र अनुज रावतले पहिलो विकेटका लागि ५० रनको साझेदारी गरे । राहुल चाहरले यो साझेदारी तोडेका थिए । उनले रावतलाई क्लिन बोल्ड गरे । रावतले २० बलमा २ चौका र एक छक्का प्रहार गर्दै २१ रन बनाउन सके । त्यसपछि विराट कोहली र डु प्लेसिसले चौका र छक्काको वर्षा गरे ।
यी दुईबीच दोस्रो विकेटका लागि ६१ बलमा ११८ रनको साझेदारी भयो । यसैबीच डु प्लेसिसले आफ्नो २३ औं अर्धशतक बनाए । उनी ५७ बलमा तीन चौका र सात छक्का प्रहार गर्दै ८८ रन बनाएर आउट भए । अर्शदीपले उनको विकेट लिए । सात रनको व्यक्तिगत स्कोरमा शाहरुख खानले डु प्लेसिसको क्याच छोडेका थिए तर अन्ततः शाहरुखले नै क्याच लिए ।
अन्त्यमा दिनेश कार्तिकले कोहलीसँग मिलेर बैंगलोरलाई २०५ रनको स्कोरमा पुर्याए । कार्तिकको स्ट्राइक रेट २२८ थियो । यस्तै, कोहलीले १४१ को स्ट्राइक रेटमा रन बनाए । कोहली र कार्तिकबीच तेस्रो विकेटका लागि १७ बलमा ३७ रनको साझेदारी भएको थियो । बैंगलोरले अन्तिम ५ ओभरमा एक विकेट गुमाएर ६३ रन बनाएको थियो ।
पञ्जाबको टोलीले राम्रो सुरुवात गरेको थियो । मयंक अग्रवाल र शिखर धवनबीच ७१ रनको ओपनिङ साझेदारी भयो । पञ्जाबलाई पहिलो झटका मयङ्कको रुपमा लाग्यो । उनी २४ बलमा ३२ रन बनाएर आउट भए । उनले आफ्नो पारीमा दुई चौका र दुई छक्का प्रहार गरे । यसपछि धवन र आईपीएल डेब्यु गरेका भानुका राजपाक्षेले दोस्रो विकेटका लागि २५ बलमा ४७ रनको साझेदारी गरे ।
धवन २९ बलमा ४३ रन बनाएर आउट भए । जसमा पाँच चौका र एक छक्का समावेश थियो। त्यसपछि सिराज चम्किए । १४औं ओभरमा उनले भानुका राजापाक्षे र डेब्यु खेल्ने राज बावालाई लगातार दुई बलमा पभिलियन पठाए । राजपाक्षे २२ बलमा दुई चौका र चार छक्का प्रहार गर्दै ४३ रनको शानदार इनिङ्स खेलेर आउट भए । सोही क्रममा अन्डर–१९ स्टार बावा शून्य रनमा पभिलियन फर्किए ।
लियाम लिभिङस्टोन १० बलमा १९ रन बनाएर आउट भए । जसमा दुई छक्का सामेल थिए । अन्तमा ओडियन स्मिथ र शाहरुख खानले २५ बलमा ५२ रनको अविजित साझेदारी गर्दै पञ्जाब टोलीलाई जित दिलाएका थिए । बैंगलोरका लागि सिराजले दुई विकेट लिए । यस्तै आकाश दीप, वानिन्दु हसरंगा र हर्षल पटेलले एक–एक विकेट लिए ।
आजको खेलः गुजरात टाइटन्सविरुद्ध लखनउ सुपर जाइन्ट्स – ७ः४५ बजे
