काठमाडौँ । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले गृह जिल्ला चितवन पुगेर गठबन्धनका विषयमा दिएको अभिव्यक्तिले चितवन कांग्रेसमा तरङ्ग आएको छ ।
दाहालले ‘अहिलेकै गठबन्धन स्थानीय मात्र होइन प्रादेशिक र सङ्घीय चुनावसम्म पनि रहन्छ चितवन कांग्रेसले भनेर केही हुँदैन’ भन्ने अभिव्यक्ति दिनुभएको थियो । नेपाली कांग्रेसभित्र पनि गठबन्धनका विषयमा दुई धार देखिँदै आएको छ ।
प्रचण्डको अभिव्यक्तिपछि केन्द्रीय प्रतिनिधिका रुपमा चितवनमा रहनुभएका कांग्रेस केन्द्रीय सदस्य अब्दुल सतारले न्यूजपोलारसँग भन्नुभयो, “गठबन्धन भएको कमजोरले बलियोसँग गर्ने हो चितवनमा कांग्रेस धेरै नै बलियो छ, यस्तो अवस्थामा कसरी गठबन्धन हुन्छ र ?” “म केही सातादेखि नै चितवनमा छु, कार्यकर्ताको मनस्थिति गठबन्धनको पक्षमा देखिँदैन ।
माथिको निर्णय आफ्नो ठाउँमा होला तर कार्यकर्ता त्यसलाई सहजरुपमा स्वीकार गर्ने मनस्थितिमा छैनन् । दाहालको अभिव्यक्तिपछि झन चिढ्याउने काम भएको छ”, सत्तारले भन्नुभयो, “२०७४ सालको स्थानीय निकायको निर्वाचनको बेला गठबन्धन अचानक बनेको थियो तर अहिले त्यो अवस्था छैन । कमजोरले गठबन्धन गर्न खोज्ने अनि बलियोले गुमाउनु पर्ने त्यो होला जस्तो लाग्दैन ।”
उहाँका अनुसार भरतपुर महानगरपालिकाका २९ ओटा वडामध्ये २० ओटा वडामा कांग्रेस एक्लै बलियो छ र माओवादीको प्रभाव दुई ओटा वडामा मात्र देखिएको छ । अन्य वडामा अरु दलको प्रभाव देखिएको छ । स्थानीय अवस्थाको विश्लेषण नगरी निर्णय गरे चितवनको हकमा प्रत्युत्पादक हुनसक्ने उहाँको बुझाइ छ । कार्यकर्ताकै माझबाट उहाँले बलजफ्ती निर्णय भए दूर्घटना हुनसक्ने र फरक परिणाम आउनसक्ने चेतावनी दिनुभयो ।
उहाँले भन्नुभयो, “गठबन्धन आवश्यकताको सिद्धान्तको आधारमा हुने हो, यहाँ कांग्रेसलाई आवश्यक छैन ।” यस पटक कांग्रेसका मतदाता र शुभेच्छुकहरुले रुखमा नै भोट हाल्ने स्पष्ट पार्दै उहाँले भन्नुभयो, “दाहालको त्यो भनाइ निजी हो, रुखमा भोट हाल्न नपाउने अवस्था उत्पन्न हुँदैन ।”
