सिन्धुली । एकदिने मेयर बन्ने अवसर पाएकी कमलामाई नगरपालिका १३ रानीवास निवासी १८ वर्षीय किशोरी स्वस्तिका बख्रेल चर्चामा आएकी छन् ।
बहालवाला मेयर खड्गबहादुर खत्रीले तीन दिनपछि हुने अन्तर्राष्ट्रिय बालिका दिवसका अवसरमा स्वस्तिकालाई पदभार ग्रहण गराएका हुन् ।
जनजाति विकास समाजले स्वस्तिकालाई शुक्रबार कमलामाई नगरपालिकाको एकदिने नगर प्रमुख बन्ने अवसर प्रदान गरेको थियो ।
सानै उमेरकी स्वस्तिकालाई एक दिनका लागि मेयर पदमा बहाली गर्न पाउँदा आफू खुसी बनेको मेयर खत्रीले बताए । साथै उक्त कार्यक्रमले किशोर तथा बालबालिकाको हितमा नयाँ सन्देश दिने उनको भनाई छ ।
स्वस्तिकाले पदबहाल गर्दै किशोरी तथा बालबालिकाहरुको शिक्षा, स्वास्थ्य र सुरक्षाका लागि नयाँ योजना बनाएर कार्यान्वयन गर्नुपर्ने धारणा व्यक्त गरिन् ।
उनी हाल गौमती नमूना उच्च माविबाट १२ कक्षाको परीक्षा सकेर बसेकी छन् । यस्तै केही वर्षयता किशोरी र बालिकाहरुमा जनचेतनाका लागि उनी अग्रसर छिन् ।
