लन्डनः बेलायतमा एक सांसदको एसेक्सस्थित लि अन सी चर्चमा छुरा प्रहार गरी हत्या गरिएको छ ।
प्रहरीले छुरा प्रहारको आशंकामा एक २५ वर्षीय युवकलाई गिरफ्तार गरेको छ ।
प्रहरीका अनुसार, हत्या गरिएका सांसद सर डेभिड एमिस रहेका छन् । ६९ वर्षीय उनलाई आफ्नो निर्वाचन क्षेत्रमा आयोजित एक कार्यक्रममा भाग लिइरहेको अवस्थामा युवकले कम्तीमा चार पटक छुरा प्रहार गरेका थिए । उनको घटनास्थलमै मृत्यु भएको थियो ।
प्रहरीले उक्त घटनाको अनुसन्धान गरिरहेको जनाएको छ ।
डेभिडको हत्याप्रति बेलायतका प्रधानमन्त्री बोरिस जोन्सन समेतका नेताहरुले दुःख व्यक्त गर्दै देशले एक असल व्यक्ति गुमाएको बताएका छन् ।
पाँच बालबच्चाका पिता डेभिड सन् १९८३ देखि बेलायती संसदको सदस्य रहँदै आएका थिए ।
बेलायतमा पाँच वर्षभित्र बहालबाला सांसदको हत्या भएको यो दोस्रो घटना हो । यसअघि सन् २०१६ मा लेबर पार्टीका सांसद जो कोक्सको हत्या भएको थियो । एपी