काठमाडौं । सर्वसाधारण र संस्थागत रुपमा बैंकमा रकम जम्मा गर्नेहरुका लागि आकर्षक ब्याजदर घोषणा गरेका बैंकहरुलाई नेपाल राष्ट्र बैंकले तत्कालै त्यस्तो ब्याजदर घटाउन निर्देशन दिएको छ ।
राष्ट्र बैंकले कार्तिक १ गतेदेखि लागू हुने गरी ब्याजदर बढाएका बैंकहरुलाई बुधबारभित्रै नयाँ ब्याजदर तोकेर लागू गर्न निर्देशन दिएको हो ।
मुद्दती निक्षेपमा १० देखि ११ प्रतिशतको हाराहारीमा ब्याज दिने र यो कात्तिक १ गतेदेखि लागू हुने भन्दै बैंकहरुले विज्ञापन र आफ्ना वेबसाइटमा नयाँ ब्याजदर राखेका थिए । यो ब्याजदर तीन वर्ष यताकै उच्च ब्याजदर हो ।
नयाँ ब्याजदर निकै उच्च भएकाले पनि आम सर्वसाधारणले आफूसँग रहेको रकम बैंकमा राख्ने सम्भावना देखिएको थियो । साथै यसबाट ऋण लगानीको ब्याज बढ्ने भन्दै आलोचना पनि हुन थालेको थियो । यही कारण शेयर बजारमा समेत यसको नकारात्मक असर परेको छ ।
मंगलबार साझ अपर्झट तीन बुँदे निर्देशन जारी गर्दै राष्ट्र बैंकले बैंक तथा वित्तीय संस्थाहरुलाई अघिल्लो प्रकाशित ब्याजदरमा १० प्रतिशतमात्रै परिवर्तन गर्न सक्ने बताएको छ ।
राष्ट्र बैंकका कार्यकारी निर्देशक देवकुमार ढकालव्दारा जारी निर्देशनमा संस्थागत मुद्दति निक्षेपमा प्रदान गरिने अधिकतम ब्याजदर सर्वसाधारणलाई प्रदान गरिने भन्दा कम्तिमा एक प्रतिशतले कम हुनुपर्ने उल्लेख छ ।
यसैगरी यो निर्देशन भोलि बुधबार नै कार्यान्वयन गरी नयाँ ब्याजदर आफ्नो वेबसाइटमार्फत सार्वजनिक गर्न बैंकहरुलाई केन्द्रीय बैंकले एक दिने अल्टिमेटम दिएको छ ।
यस्तो ब्याजदर मिति कात्तिक ४ गतेभित्र दैनिक पत्रिकामासमेत प्रकाशन गर्न निर्देशन दिइएको छ ।
