जनकपुर । सिके राउत नेतृत्वमा रहेको जनमत पार्टीका कार्यकर्ताले जनकपुर खानेपानी संस्थानका निमित्त प्रमुख राजेश कुशवाहालाई अर्धनग्न बनाउँदै हिलो दलेर नगर घुमाएका छन् ।
ढल निर्माणमा अनियमितता गरेको आरोप लगाउँदै जनमत पार्टीका कार्यकर्ताहरुले निमित प्रमुख कुशवाहालाई बिहीबार अर्धनग्न गरेर नगर घुमाएका हुन्। ढल निर्माणमा अनियमितता गर्दै गुणस्तरहिन काम गरेका कारण अविरल वर्षामा जनकपुरधाम जलमग्न भएको आरोप जनमत पार्टीका कार्यकर्ताहरुले लगाएका छन् ।
जनकपुरको रामानन्दचोकमा रहेको खानेपानी संस्थानको कार्यालयमा लाठी भाटासहित प्गेका जनमत पार्टीका कार्यकर्ताहरुले निमित प्रमुख कुशवाहालाई कार्यकक्षबाट तानेर कुटपिटसमेत गरेका थिए। उनीहरुले निमित्त प्रमुख कुशवाहाको कपडा च्यातेर अर्धनग्न बनाइ नालामा रहेको हिलो दलेर जनकपुर घुमाएका हुन्।
