काठमाडौं । प्रधानमन्त्री शेरबहादुर देउवाले नेपाली कांग्रेसको निर्वाचन आफुलाई थाह नहुने बताएका छन् । नेपाली कांग्रेसका सभापती समेत रहेका देउवाले शुक्रबार प्रेस युनियन कैलालीले धनगढीमा आयोजना गरेको प्रेस मिटलाई सम्बोधन गर्दै पार्टीको निर्वाचन निर्वाचन समितिलाई थाह हुने भन्दै पन्छिएका हुन् ।
प्रत्रकारले कैलालीसहित केही जिल्लामा पार्टीको निर्वाचन हुन सकेको छैन भनी सोधिएको प्रश्नको जवाफमा देउवाले भने, 'पार्टीको निर्वाचन ? त्यो त निर्वाचन समितिलाई थाह हुन्छ। त्यो त मलाई थाह हुँदैन। पार्टीको निर्वाचन समितिलाई थाह हुन्छ।'
कांग्रेसको १४ औं महाधिवेशनको कार्यतालिका पटकपटक सर्दै आएको छ। यसबारेको प्रश्नमा देउवाले निर्वाचन समितिकै भर पर्ने कुरा उल्लेख गरे।
यस्तै प्रधानमन्त्री देउवाले अमेरिकी मिलेनियम च्यालेन्ज कर्पोरेसन (एमसीसी) हुबहु पास हुने बताएका छन् । एमसीसी के हुन्छ प्रधानमन्त्रीज्यू ? सञ्चारकर्मीले सोधेको प्रश्नको जवाफमा देउवाले भने, 'एमसीसी पास गर्ने हो।'
संशोधन हुन्छ कि हुबहु ? भन्ने प्रश्नमा देउवाले अनुदानजस्तो कुरामा अलमल गर्न नहुने उल्लेख गरे। 'वर्ल्ड बैंक छ नि। एडिबी छ। उनीहरुलाई नेपालको कानुन लागू हुँदैन। अन्तर्राष्ट्रिय कानुन लागू हुन्छ,' उनले भने, 'तर एमसीसी त अनुदान हो। नेपालको कानुनभन्दा तल हो भनेर उनीहरुले भनिसके। अनुदानजस्तो कुरामा किन नलिने ?'
देउवा मन्त्रीहरुको टोली लिएर बिहीवार सुदूरपश्चिमको बाढीपहिरो ग्रस्त क्षेत्र निरीक्षणका लागि त्यसतर्फ प्रस्थान गरेका हुन्। उनी आजै काठमाडौं फर्कने कार्यक्रम रहेको छ।
