काठमाडौं । नेपाली कांग्रेसका नेता प्रकाशमान सिंहले खेलमा भविष्य देख्नेहरुको जमात बाक्लिन थालेको बताउनुभएको छ ।
मंगलवार गणेशमान सिंह स्पोर्ट कमिटीले आयोजना गरेको ‘टेनिस टुर्नामेण्ट २०२१’ मा बोल्दै नेता सिंहले आन्तरिक खेलले खेलाडीहरुलाई अवसर दिने बताउँदै खेलमा भविष्य देख्नेहरुको जमात बाक्लिन थालेको र खेलमा आकर्षित हुनेहरु बढ्न थालेको बताउनुभएको हो ।
उहाँले कोराना भाइरसको जोखिमका बेला पनि कमिटीले खेलाडीहरुलाई मध्यनजर गर्दै कार्यक्रम सञ्चालन गरेकोप्रति खुशी व्यक्त गर्नुभयो । उहाँले आन्तरिक खेलले खेलाडीहरुको मनोबल बढाउने बताउनुभयो । यो खेल टेबल टेनिसको इतिहासमा कोशेढुंगा साबित हुने गरी कमिटीले काम गर्ने विश्वास व्यक्त गर्दै नेता सिंहले खेलले नै मानसिक र शारीरिक रुपमा स्वस्थ राख्ने बताउनुभयो ।
नेता सिंहले भन्नुभयो, आन्तरिक खेलले खेलाडीहरुलाई अवसर सिर्जना गर्छ, यस्ता टुर्नामेण्ट भए मात्र खेलाडीले आफ्नो प्रदर्शन गर्न पाउँछन्, यो टुर्नामेण्ट टेनिसको इतिहासमा कोशेढुंगा साबित हुने गरी काम हुनेछ, खेललाई बिस्तारै प्रोत्साहन गर्नेहरुको जमात बढेको छ, यो सिम्टन आइरहेको छ, यसलाई राम्रो मान्नुपर्छ, खेलले धेरै कुरामा सहयोग गरिरहेको हुन्छ तर हामी त्यसलाई नजरअन्दाज गर्दछौँ, खेलले मानसिक र शारीरिक रुपमा स्वस्थ बनाउँछ, अर्को भनेको खेलले संकटको बेला तत्काल उचित निर्णय लिने कुरामा पनि सहयोग गर्दछ ।’
गणेशमान सिंह स्पोर्ट्स कमिटीले आयोजना गरेको ‘टेनिस टुर्नामेण्ट २०२१’ आजबाट शुरु भएको छ । टुर्नामेण्ट कार्तिक १६ गतेसम्म चल्नेछ भने यसमा ८ वर्ष उमेर समूहदेखि ६५ वर्षसम्मका खेलाडीहरुले भाग लिन पाउनेछन् । विजेताले ७ लाख २५ हजार धनराशी बराबरको पुरस्कार पाउने आयोजकले जनाएको छ ।
