काठमाडौं । सामाजिक सञ्जाल फेसबुकले आफ्नो कम्पनी नाम परिवर्तन गरेको छ ।
बिहीबार फेसबुकको वार्षिक कनेक्ट कन्फ्रेन्समा फेसबुकका कार्यकारी अधिकृत (सीईओ) मार्क जुकरबर्गले कम्पनीका नयाँ कर्पोरेट नाम परिवर्तन गरी ‘मेटा’ सार्वजनिक गरेका हुन् ।
कम्पनीलाई नयाँ नाम दिइएपनि यसअधिका कुनै संरचनामा भने परिवर्तन नहुने उनले सो समारोहमा बताए । साथै, यसअघि सञ्चालित एप्स र तिनका ब्रान्ड परिवर्तन नहुने समेत उनले जनाए ।
फेसबुकले अब सामाजिक सञ्जालभन्दा बाहिरका क्षेत्रमा पनि आफ्नो काम विस्तार गर्ने जनाएको छ । जसका लागि नयाँ नाम चाहिएको पनि उसले जनाएको छ ।
फेसबुकले केही समय अगाडि मात्रै भर्चुअल रियालिटीका क्षेत्रमा काम गर्ने गरी विकास गर्न लागेको ‘मेटाभर्स’ प्रोजेक्टका लागि युरोपमा १० हजार कर्मचारी नियुक्तिको तयारी गरेको घोषणा गरेको थियो ।
फेसबुकले आफ्नो स्वामित्वमा फेसबुकसँगै मेसेन्जर, ह्वाटस्एप, इन्स्टाग्रामलगायतलाई लिएको छ ।