काठमाडौँ । नेकपा (एकीकृत समाजवादी)का अध्यक्ष माधवकुमार नेपालले नेकपा (एमाले)का अध्यक्ष केपी शर्मा ओलीको वितण्डा रोक्न संसद् भङ्ग गरी अर्ली इलेक्सनमा जानुपर्ने बताउनुभएको छ । आइतबार प्रतिनिधिसभा बैठक सुरु हुनुअघि संसद् भवन परिसरमा पत्रकारहरुसँग कुरा गर्दै अब संसद्समेत भङ्ग गरेर तीन तहको निर्वाचनमा जानु उपयुक्त हुने बताउनुभयो ।
नेकपा (एमाले) ले संसद् चल्न नदिएर हैरान पारेको भन्दै उहाँले एमाले अध्यक्ष ओलीको वितण्डा रोक्न पनि संसद् भङ्ग गर्नुपर्ने भनाइ राख्नुभयो । उहाँले भन्नुभयो, “संसद्मा केपी ओलीलाई कति सहने । एमालेले सदन चल्न पनि नदिने, भत्ता खाइरहने, हामीलाई पनि हैरान पार्ने, त्यसैले अब संसद् भङ्ग गर्ने, संसद् पनि रहन्न यो बितन्डा पनि रहन्न । अब सबै निर्वाचनमा जाऔं ।” तर नेकपा (माओवादी केन्द्र) का नेता वर्षमान पुनले भने वैशाख ३० मा स्थानीय तहको चुनाव घोषणा भइसकेकाले प्रतिनिधिसभाको निर्वाचनमा अहिले नै जान नमिल्ने बताउनुभयो ।
उहाँले स्थानीय तहको निर्वाचन घोषणा भइसकेको भन्दै अर्ली इलेक्सन साउन वा भदौमा गर्न सम्भव नहुने बताउनुभयो ।
