दमौली, २७ मंसिर । मादक पदार्थ सेवन गरी तनहुँ जिल्लाभित्र सवारी साधन चलाउने तीन जना चालकविरुद्ध जिल्ला प्रहरी कार्यालय तनहुँले सार्वजनिक अपराध सम्बन्धी मुद्दा दर्ता गरेको छ ।
धादिङको नौबिसे गाविस वडा नं १ घर भएका ४३ वर्षका शङ्कर श्रेष्ठ, व्यास नगरपालिका–१ का २९ वर्षका हिमकुमार श्रेष्ठ र पोखरा उपमहानगरपालिका–१३ का २२ वर्षका धु्रवबहादुर सुयल थापाविरुद्ध मुद्दा दर्ता गरी अनुसन्धान गरिरहेको जिप्रका मुद्दा शाखाका प्रहरी नायब निरीक्षक मोहनकुमार खड्काले बताए ।
जाँचका क्रममा उनीहरुले मादक पदार्थ सेवन गरी सवारी साधन चलाएको पाइएको प्रहरीको भनाइ छ । ती चालकलाई दमौली अस्पतालमा लगेर स्वास्थ्य परीक्षण गर्दा मादक पदार्थ सेवन गरेको पुष्टि भएपछि सार्वजनिक अपराधसम्बन्धी मुद्दा दर्ता गरिएको हो ।
सवारी दुर्घटनामा ९५ प्रतिशतभन्दा बढी चालकको लापर्बाही देखिएपछि मापसे जाँच कार्यलाई तीव्र पारी यस्ता कार्यलाई अभियानकै रुपमा अगाडि बढाइएको हो ।
