काठमाडौ । संवैधानिक परिषदको वैठक आज बेलुका ५ बजे सिंहदरबारमा बस्ने भएको छ । बैठक प्रधान न्यायाधीश नियुक्तिको सिफारिसमा केन्द्रीत हुने कार्यक्रम स्रोतको दाबी रहेको छ ।
प्रधानन्यायाधीशमा यसअघि न्याय परिषदले दुई जनाको नाम सिफारिस गरेको छ। सर्वोच्चका दुई जना बरिष्ट न्यायाधीशहरू चोलेन्द्र शम्शेर राणा र दीपकराज जोशीको नाम संवैधानिक परिषदमा छ । उक्त नाम मध्ये एकलाई सिफारिस गर्न यसअघि बसेको संवैधानिक परिषदको बैठक प्रमुख प्रतिपक्ष नेपाली काँग्रेसका सभापतिको समया अभावको कारण रोकिएको थियो ।
तथापि बैठकमा दुवै न्यायाधीशको नाम प्रस्तावित भएको थियो । आजको बैठकले सम्भवतः चोलेन्द्र शम्शेरको नाम भावी प्रधान न्यायाधीशका लागि मनोनयन गर्नेछ ।
प्रधानन्यायाधीशको पद रिक्त भएको अवस्थामा प्रधानन्यायाधीशको नियुक्तिको सिफारिस गर्दा संवैधानिक परिषदमा नेपाल सरकारको कानून तथा न्याय मन्त्री सदस्यको रूपमा रहने ब्यवस्था रहेको छ ।
प्रधानन्यायाधीश सिफारिस गर्ने संवैधानिक परिषदमा प्रधानमन्त्री अध्यक्ष तथा सदस्यहरुमा प्रधानन्यायाधीश, प्रतिनिधिसभाका सभामुख, राष्ट्रियसभाका अध्यक्ष, प्रतिनिधिसभामा प्रतिपक्षी दलका नेता, प्रतिनिधिसभाका उपसभामुख र कानुनमन्त्री रहने प्रावधान रहेको छ ।
