काठमाडौं । प्रधानमन्त्री एवम् नेपाल कम्युनिष्ट पार्टी (नेकपा) का अध्यक्ष केपी शर्मा ओलीले दुई अध्यक्षबीच फाटो ल्याउने बाह्य शक्तिले कोशिस गरिरहेको आरोप लगाएका छन् ।
दुई अध्यक्षबीच भउको एकतालाई तोड्न जति प्रयास गरे पनि सफल नहुने पनि उनले स्पष्ट पारेका छन् । देशलाई समृद्ध बनाउन गरेको एकता कसैले अरु कसैले तोडन् नसक्ने ओलीको भनाइ थियो । प्रधानमन्त्री ओलीले असभ्य ढंगले आफु प्रस्तुत हुने बुद्धिजीविहरुलाई बारम्बार आफूले सचेत गराउँदा पनि त्यसलाई अन्यथा प्रचार गरिएको भन्दै गम्भिर आपत्ति जनाए छन् ।
तत्कालीन एमाले र माओवादी केन्द्रका कानुन व्यवसायीहरुको संगठनलाई एकीकरण गर्न आईतबार पार्टी केन्द्रीय कार्यालय धुम्बाराहीमा आयोजित कार्यक्रममा बोल्दै उनले मुलुक बनाउने संकल्पका साथ भएको दुई अध्यक्षबीचको एकता विश्वमै नमूना एकता भएको उल्लेख पनि गरे ।
प्रधानमन्त्री ओलीले सरकारविरुद्ध भयानक प्रचार बाजि सुरुवात भइरहेको दावी पनि गरेका छन् । उनले राष्ट्रपति जस्तो गणतन्त्र नेपालको सम्मानित तथा मर्यादित संस्थालाई निरन्तर आक्रमण प्रयास भइरहेको भन्दै दुखेसो प्रकट गरेका छन् ।
कार्यक्रममा बोल्दै नेपाल कम्युनिष्ट पार्टी (नेकपा) का अध्यक्ष पुष्पकमल दाहालले मुलुकलाई समृद्ध बनाउने अभियानमा सकेको योगदान गर्न पार्टीका कानुन व्यवसायीहरुलाई आग्रह गरे ।
उनले कार्यपालिका, न्यायपालिका र व्यवस्थापिकाबीच हुने अपुगलाई पूर्णता दिन पार्टीका कानुन व्यवसायीहरुले महत्वपूर्ण भूमिका निर्वाह गर्न सक्ने विश्वास पनि व्यक्त गरेका छन्।
