काठमाडाैं – अख्तियार दुरूपयाेग अनुसन्धान अायाेगले स्वास्थ्य निर्देशनालय, गण्डकी प्रदेश, पोखराका प्रमुख एवं प्रदेश स्वास्थ्य निर्देशक (मेडिकल जनरलिष्ट -११ औं तह) डा. तारानाथ पौडेल विरूद्ध घुस लिएकाे अाराेपमा मंगलबार विशेष अदालत काठमाडौंमा आरोप-पत्र दायर गरेकाे छ ।
अायाेगका प्रवक्ता एवं सहसचिव रामेश्वर दंगालद्वारा मंगलबार जारी विज्ञप्तीमा डा पाैडेलले स्वास्थ्य सेवा, हेल्थ इन्सपेक्सन समूह (खुला) को अ.हे.व.पदको लिखित परीक्षामा उत्तीर्ण भएका परिक्षार्थीलाई लोकसेवाको परीक्षाको अन्तर्वार्तामा उत्तिर्ण गराईदिन्छु भनी घुस मागिरहेकाे भन्ने सूचना एवं उजुरीको आधारमा रंगेहात पक्राउ गरिएकाे उल्लेख छ ।
निज पाैडेललाइ अख्तियार दुरुपयोग अनुसन्धान आयोगको कार्यालय पोखरा, कास्कीबाट खटिइ गएको टोलीले एक लाख घुसबापतको रकम लिइसकेको अवस्थामा नियन्त्रणमा लिएकाे थियाे ।
पाैडेलले भ्रष्टाचार निवारण ऐन, २०५९ को दफा ३ को उपदफा (१) बमोजिम कसुर गरेको देखिएकाे भन्दै बिगो एक लाख कायम गरी भ्रष्टाचार निवारण ऐन, २०५९ बमाेजिम सजाय मागदाबी गरिएकाे अायाेगकाे भनाइ छ ।
