गुल्मी । जिल्ला प्रहरी कार्यालय गुल्मीले चार भरुवा बन्दुक र बिष्फोटक पदार्थसहित एकजनालाई पक्राउ गरेको छ ।
पक्राउ पर्नेमा धुर्कोट गाउँपालिका–३ हाडहाडेका ५१ वर्षीय शेरबहादुर जिसी रहेको प्रहरीले जनाएको छ ।
आइतबार प्रहरीले जिसीलाई पत्रकार सम्मेलन गरी सार्वजनिक गर्दै जिसीको घरबाट एकनाले भरुवा बन्दुक ४ नाल, मेडइन कोलकाता लेखेको एउटा, २६ र २२ ईन्च लामो बन्दुको नाल दुईवटा, छर्रा बनाउन प्रयोग हुने १९ ईन्च लामो रड ६ पिस र ६ देखि ८ ईन्च लम्बाईका रड ६ पिस बरामद भएको प्रहरीले जनाएको छ ।
साथै बारुद आधा किलो, पटका सानोठूलो गरी ५ पाकेट, बन्दुकको केप १, बन्दुको टेगर १, कटिङ्ग पेलेट १, सटगनको खोका १, बरामद गरेको छ ।
जिसीलाई हाल जिल्ला प्रहरी कार्यालय गुल्मीमा राखेर थप अनुसन्धान सुरु गरिएको छ ।
