कपिलवस्तु । भारतबाट दुई बालकलाई उद्धार गरी शान्ति पुनस्र्थापना गृहले परिवारसँग पुनर्मिलन गराएको छ । भारतको हरिद्वार सुधार गृहबाट उद्धार गरी शान्ति पुनस्र्थापना गृहले नेपालगञ्ज उपमहानगरपालिकाका दुई बालकलाई परिवारलाई बुझाएको हो ।
उद्धार गरिएका बालकहरु नेपालगञ्ज उपमहानगरपालिका २०, मनिकापुरका हुन् । तीन महिनाअघि घरबाट भागेर १४ वर्षे निशान्त गिरी र १५ वर्षे कालु वि.क. भारत पुगेका थिए । भारतको देहरादूनस्थित हेल्पप्रसका अध्यक्ष विशाल थापाको समन्वयमा शान्ति पुनस्र्थापना गृहले नेपाल फर्काउन सफल भएको शान्ति पुनस्र्थापना गृह कृष्णनगरका संयोजक भूमिराज भट्टराईले जानकारी दिनुभयो ।
नेपाल फर्काइएका बालकहरुलाई वडाध्यक्ष कृष्ण कार्कीको रोहबरमा परिवारको जिम्मा लगाइएको संयोजक भूमिराज भट्टराईले बताउनुभयो। बालकहरु फेला परेको खबर पाए लगत्तै शान्ति पुनस्र्थापना गृह कृष्णनगरका संयोजक भूमिराज भट्टराई तथा पीआरसी केन्द्रिय कार्यालयका सुमन सापकोटा र लेखाअधिकृत दिनेश्वर गौरसहितको टोली भारतको देहरादून पुगेको थियो । देहरादूनस्थित बाल कल्याण गृहको आदेश लिई बालकहरुलाई हरिद्वारस्थित बाल सुधार गृहबाट जिम्मा लिई नेपाल फर्काउन सफल भएको संयोजक भट्टराईले बताउनुभयो । नेपाल समाचारपत्रबाट
