विराटनगरः मोरङको हात्तीमुडामा रहेको मनमोहन स्मृति पोलिटेक्निकलाई जापान सरकारका तर्फबाट उपलब्ध गराइएका प्राविधिक उपकरणहरु नेपालस्थित जापानी राजदूतावासका अधिकृत मासाओ कुनिसाडाले हस्तान्तरण गर्नुभयो ।
राजदूतावासका अनुसार हस्तान्तरण गरिएका सामग्रीको मूल्य करिब ७७ लाख रुपैयाँ रहेको छ ।
हस्तान्तरण गरिएका सामग्रीहरुमा उच्च गुणस्तरीय प्राविधिक उपकरणहरु जस्तै टोटल स्टेसन, डिजिटल थियोडोलाइट, टेस्टिङ मेसिन, एयर एन्ड ओइल सर्किट ब्रेकर्स तथा माइक्रो–हाइड्रो मोडेल रहेका छन् । यी उपकरणको सहायताबाट विद्यार्थीहरुले इन्जिनियरिङको व्यवहारिक ज्ञान र सीप हासिल गर्न सक्नेछन् ।
यो पोलिटेक्निक स्कुल सन् २००३ मा स्थापना भएको हो । यहाँ हाल करिब १ हजार ६०० विद्यार्थी अध्ययनरत छन् । यहाँ सिभिल, मेकानिकल, इलेक्ट्रिकल र इलेक्ट्रोनिक इन्जिनियरिङ विषय पढाइ हुने गरेको छ ।
दूतावासका अनुसार उक्त सहयोगबाट नेपाल र जापानबीचको जनस्तरको सम्बन्धलाई थप प्रगाढ बनाउन ठूलो मद्दत पुग्नेछ ।
