काठमाडौँ । युएई प्रहरीले नेपालले इन्टरपोल रेड नोटिसमा राखेका सुन तस्करका आरोपी हरिशरण खड्कालाई पक्राउ गरेको छ ।
युएई प्रहरीले खड्का विरुद्धका कानूनी कागजपत्र माग गरेको र नेपाल एनसिबीमा उक्त कागजात पठाउने तयारीमा आफुहरु रहेको इन्टरपोलको काठमाडौँ इन्चार्ज एसपी उमेशराज जोशीले बताएका छन् ।
दुबई ( युएई)मा पक्राउ परेका छन्, त्यहाँको कानूनी प्रक्रिया पुरा गरि नेपाल ल्याउने छौं,’ एसपी जोशीले भने, ‘सबै प्रक्रिया पुरा गर्न ८०–९० दिन लाग्न सक्छ।’
एसपी जोशीका अनुसार विशेष अनुसन्धान टोलीले खड्काको संलग्नता सहित उनलाई पनि सुन तस्करी र सनम शाक्य हत्या प्रकरणमा प्रतिवादी बनाएको थियो । सो प्रकरणमा मुछिएपछि खड्का नेपाल छाडेर दुबई बस्दै आएका थिए ।
खड्का यसअघि २० पुस २०७३ मा केन्द्रीय अनुसन्धान ब्युरोले बरामद गरेको साढे ३३ किलो सुन तस्करीमा समेत मुछिएका थिए ।
यसअघि सोही मुद्दामा दुबईबाट पक्राउ गरी प्रहरीले बेनु श्रेष्ठलाई नेपाल ल्याएको थियो । गिरोहका नाइकेमध्ये एक चुणामणि उप्रेती ‘गोरे’का भाई पनि दुबईमा पक्राउ परेकोमा ल्याउने प्रक्रिया अघि बढाइएको छ । खड्का पनि गोरेका प्रमुख साझेदार हुन् ।
