काठमाडौँ । स्पेनिस कोपा डेल रे फुटबलमा आज दुई ठूला क्लब बार्सिलोना र रियल मड्रिड भिड्दैछन् । प्रतियोगिताको अन्तिम चारअन्तर्गत पहिलो लेगको खेलमा आज इएल क्लासिको भिडन्त हुन लागेको हो ।
नेपाली समय अनुसार रातिको १ बजेर ४५ मिनेटमा सुरु हुने खेलमा बार्सिलोनाका कप्तान लियोनल मेस्सीलाई देख्न पाईने वा नपाईने भन्ने कुरा अझै निश्चित भएको छैन् । मेस्सी शनिबार भ्यालेन्सियासँग २–२ को बराबरी खेल्ने क्रममा तिघ्रामा चोट लागेर घाइते भएका थिए । बार्सिलोनाले कप्तान मेस्सीलाई रियल मड्रिडविरुद्धको खेलमा राख्ने निर्णय गरेको छ ।
तर, मेस्सी खेल्न नखेल्ने निर्णय अन्तिम मिनेटमा हुने बार्सिलोनाका प्रशिक्षक एर्नेस्टो भालभेर्डेले स्पेनिस मिडियाहरुसँग बताए छन् ।
बुधबार क्याम्प नाउमा हुने खेल २५ दिनभित्र हुने तीन इएल क्लासिको मध्ये पहिलो हो । दोस्रो लेग २७ फेब्रुअरीमा हुनेछ भने ला लिगाको क्लासिको २ मार्चमा हुनेछ ।
यसअघि ला लिगाअन्तर्गत गत अक्टोबर अन्तिम साता पहिलो इएल क्लासिको भइसकेको छ । सो खेल बार्सिलोनाले आफ्नो घरमा ५–१ ले जितेको थियो ।
यसअघि यी दुई टोली सन् २०१४को फाइनलमा भिडेका थिए । त्यतिवेला रियल विजयी भएको थियो ।
सो भेटपछि रियल र बार्सिलोना कोपामा पहिलोपटक आज राति भिड्दैछन् । बुधबारको खेलका लागि बार्सिलोनाका फर्वाड उस्मान डेम्बेले पनि फिट हुनेमा शंका छ । रियल मड्रिडको टिममा भने महत्वपूर्ण खेलाडीहरु उपलब्ध छन् ।
मेस्सी खेल्न सकेनन् भने बार्सिलोनालाई दवाव पर्ने देखिन्छ । मेस्सीको अभावमा बार्सिलोनाका लागि लुइस स्वारेज र फिलिपे कोउटिन्होको जिम्मेवारी बढी हुनेछ ।
यसैगरी ला लिगाको सुरुवाती खेलमा कमजोर देखिएको रियल अहिले लयमा छ । रियलले बार्सिलोनाविरुद्ध पनि राम्रो लय समात्ने दावी गरेको छ । रियले बार्सिलोनाविरुद्ध रोजाईका खेलाडी करिम बेन्जेमा, ग्यारेथ बेल र भिनिसियस जुनियरलाई उतार्ने तयारी गरेको छ ।
