काठमाडौँ । कोपा डेल रे फुटबलअन्तर्गत सेमिफाइनलको पहिलो लेगमा घरेलु टोली बार्सिलोना र रियल मड्रिड बराबरीमा रोकिएको छ ।
बुधबार राति बार्सिलोनाको घरेलु मैदान नाउ क्याम्पमा भएको सेमिफाइनलको पहिलो लेगमा बार्सिलोना र रियल मड्रिड १–१ गोलको बराबरी रोकिएको हो । बार्सिलोनाका लागि मेलकोमले गोल गरे भने रियलका लागि लुकास भेजक्वएजले गोल गरे ।
खेलको छैटौं मिनेटमा नै लुकासले गोल गर्दै रियललाई अग्रता दिलाएका थिए । उनकै गोलमा रियलले पहिलो हाफसम्म १-० गोलको अग्रता बनाएको थियो । तर यो अग्रता दोस्रो हाफमा भने कायम रहन सकेन । खेलको ५७ औं मिनेटमा बार्सिलोनाका मेलकोमले गोल गर्दै खेल १-१ गोलको स्थितिमा ल्याए ।
नियमित कप्तान लियोनल मेस्सी भने अनफिटकै कारण दोस्रो हाफको मध्यतिर मात्रै मैदानमा प्रवेश गरे । खेलको ६३ औं मिनेटमा फिलिपे कौटिन्होको स्थानमा उनी मैदान प्रवेश गरेका थिए । तर उनले गोल गर्न भने सकेनन् ।
