प्रधानमन्त्री केपी शर्मा ओली विरुद्ध राप्रपाका सांसद राजेन्द्र लिङ्देनले अनसन बस्ने चेतावनी दिएका छन् । उनले आफ्नो क्षेत्रमा केही पनि खर्च नगरेको भन्दै अनसन बस्ने चेतावनी दिएका छन् ।
शुक्रबार प्रतिनिधिसभाको बैठकमा बोल्दै सांसद लिङ्देनले आफ्नो निर्वाचन क्षेत्रमा कार्यकर्ताको सिफारिसको आधारमा योजना छनोट गरेको र १० लाख मागेको ठाउँमा १ करोड १० लाख पठाएको भन्दै उनले विरोध व्यक्त गरे ।
लिङ्देन झापा क्षेत्र नं ३ बाट निर्वाचित राप्रपाको एक्लो सांसद भएरै आफ्नो क्षेत्रलाई नहेरेको भन्दै गुनासो पनि गरे । उनले आफू एक्लो प्रतिनिधि भएका कारण आफ्नो क्षेत्रका जनतालाई उपेक्षा गर्ने, दुःख दिने काम नगर्न सरकारलाई चेतावनी समेत दिए ।
उनले बहुवर्षीय ठेक्काहरु समेत बन्द गरेको आरोप समेत लगाएका छन् । गाउँपालिकाले माग गरेको भन्दा १ करोड बढी रकम मन्त्रालयले पठाएको भन्दै उनले आपत्ति जनाएका हुन् ।
