काठमाण्डु – नेकपाका दुई अध्यक्ष केपी ओली र प्रचण्डको जुहारी चलिरहेका बेला नेता भिम रावलले पार्टी फुटेका विगतका इतिहासलाई सम्झेर संयमित हुन आग्रह गरेका छन् । पछिल्लो समयमा अध्यक्ष ओलीका कट्टर विरोधी मानिएका रावलले आज ट्वीट गरेर विगतमा पार्टी फुटेका इतिहासको पनि मनन् गर्न र त्यो इतिहास नेकपामा पनि दोहोरिन सक्ने भन्दै संयमित हुन आग्रह गरेका हुन् ।
भेनेजुएलाको राजनीतिक संकटमा अन्तर्रा्ष्ट्रिय समुदाय विभाजित बनेसंगै सत्तारुढ नेपाल कम्युनिष्ट पार्टी(नेकपा) भित्र पनि ‘भेनेजुएलाको काण्डले हलचल मच्याएको छ । भेनेजुएला प्रकरणमा नेता भीम रावलले अरु देशबारे टिप्पणी गर्दा पार्टी फुटेका विगतको इतिहास सम्झेर संयमित हुनु पर्ने उल्लेख गरेका छन् ।
नेकपाका अध्यक्ष पुष्पकमल दाहाल प्रचण्डले अमेरिकी हस्तक्षेपको विरोध गरेसंगै अमेरिकी दूतावासले त्यसपछि सरकारको आधिकारिक धारणा मागेको थियो । घटनाक्रम विकसित हुँदै जाँदा प्रधानमन्त्री केपी शर्मा ओलीले भेनेजुएला काण्डमा प्रचण्ड केही चिप्लिएको बताएका थिए । त्यसको प्रतिक्रिया प्रचण्डले पार्टी फुट्न सक्ने सम्भावना जताएर दिए । प्रचण्डले पार्टी फुटन सक्ने सम्भावना रहेको बताएलगत्तै भीम रावलले सामाजिक सञ्जालमार्फत यस्तो बताएका हुन् ।
उनले ट्वीट गर्दै लेखेका छन्, ‘विगतमा कुनै देश र सरकार विशेषबारे सार्वजनिक रुपमा धेरै विवाद गर्दा कम्युनिष्ट पार्टीमा विभाजन समेत आएको स्मरण गर्दै संयमित भएर विधि र बैठकबाट विवाद टुंग्याउनु र पार्टी एकीकरणको काम अबिलम्ब पूरा गर्नु बुद्धिमानी कार्य ठहरिने छ ।’
