ओखलढुंगा । दुई तिहाईको कम्युनिष्ट सरकारको चर्तिकला देखेर वाकदिक्क भइरहेको बेला प्रदेश नम्बर १ का मुख्यमन्त्री शेरधन राईले अच्चमको चर्तिकला देखाएका छन् ।
मुख्यमन्त्री राई महिन्द्रा कम्पनीको शोरुम उद्घाटनका लागी हेलिकप्टर चार्टर गरेर ओखलढुंगा पुगेका हुन् । सिद्धिचरण नगरपालिका वडा नम्बर ५ वर्णालुमा रुम्जाटार अटोमोबाइल्स प्रालिले सञ्चालन ल्याएको शोरुम उद्घाटन गर्न मुख्यमन्त्री राई सोलुखुम्बुको पत्ताले हुँदै रुम्जाटार आएका हुन् ।
प्रदेश सभाका सांसद अम्बीरबाबु गुरुङसहित पत्तालेमा हेलिकप्टर राखेर हिमपात भएको क्षेत्र र महालंगुर हिमशृंखलाको अवलोकन गर्दै रुम्जाटार आएका थिए ।
रुम्जाटार विमानस्थलमा समिट हेलिकप्टरबाट दिउँसो रुम्जाटार साढे १२ बजे आएर शोरुम उद्घाटनपछि साढे ४ बजे काठमाडौं लागेका थिए ।
रुम्जाटार अटोमोबाइल्स कम्पनीमा प्रदेश सभाका सांसद गुरुङको मुख्य लगानी रहेको बताइन्छ । गुरुङकै पहलमा मुख्यमन्त्री राई कम्पनीको शोरुम उद्घाटन गर्न आएका हुन् । तर नेकपाका कार्यकर्ता भने उनको भ्रमणमाथि प्रश्न उठाउँदै आएका छन् । सदरमुकाममै आउँदा उनी नेकपाको कार्यालय नपुगी दिनभरि बसेर फर्किएपछि कार्यकर्ता चिढिएका हुन् ।