काठमाडौँ । नेपाल आयल निगमका पूर्वकार्यकारी निर्देशक गोपाल खड्का रिहा भएका छन् । खड्का विशेष अदालतमा २ करोड ५० लाख रुपैयाँ धरौटी बुझाएर रिहा भएका हुन् ।
अख्तियार दुरुपयोग अनुसन्धान आयोगले दायर गरेको भ्रष्टाचार मुद्दामा विशेष अदालतका अध्यक्ष बाबुराम रेग्मी, सदस्य प्रमोदकुमार श्रेष्ठ वैद्य र नारायणप्रसाद पोखरेलको इजलासले २ करोड ५० लाख रुपैयाँ धरौटी माग गर्ने आदेश दिएको हो ।
खड्काको धरौटी रकमका लागि मंगलबार नै नेपाल इन्भेस्टमेन्ट बैंक ग्यारेन्टी बसेकाले उनी तारेखमा छुटेका छन् ।
अनुसन्धानको क्रममा खड्काले अमिता लामा सोदेम्बाको नाममा जम्मा रु. ७,५४,५७,८७५।- बराबरको देहाय बमोजिमको सम्पत्ति लुकाई राखेको देखिएको थियो ।
१. जिल्ला काठमाडौं साबिक महांकाल गा.वि.स. वडा नं. ४ स्थित कित्ता नं. १९१ मा सि.जी. डेभलपर्सले निर्माण गरेको सि.जी. हिल्स हात्तीगौंडामा मूल्य रु. ३,२५,००,०००।- मा खरिद गरेको घर नं. ३२ ।
२. जिल्ला काठमाडौं साबिक बिष्णु बूढानीलकण्ठ गा.वि.स. वडा नं. ३ ख स्थित कित्ता नं.६८९, १४८२ र १५२० को मूल्य रु. ४०,११,८७५।- मा खरिद गरेको ८ आना जग्गा ।
३. मूल्य रु. ८४,४६,०००।- मा खरिद गरेको बा.१६च.८४८४ नं. को टक्सन गाडी ।
४. जिल्ला काठमाडौं साबिक महांकाल गा.वि.स. वडा नं. ४ स्थित कित्ता नं. ३५० मा सि.जी. डेभलपर्सले निर्माण गरेको घर नं. २२ खरिद गर्नका लागि भुक्तानी गरेको रु. ३,०५,००,०००।-
५. अमिता लामाको नाममा रहेको NMB बैंक र सिटिजन बैंकको खाताहरूबाट गोपालबहादुर खड्काले नै कारोबार गर्ने गरेको देखिएको थियो।
खड्काको बयानअनुसार नेत्रविक्रम चन्द विप्लव नेतृत्वको समूहका अम्बिका चन्दलाई १८ लाख ९९ हजार, हेमन्तप्रकाश ओली, प्रकाशराज देवकोटालाई ८ लाख ५० हजार, सुदर्शनलाई ९ लाख ९९ हजार, र दीपेन्द्र खड्कालाई ९ लाख चन्दा दिएका थिए। उनिहरुलाई सानिमा बैंकमा रहेको खाता नम्बर ००१०००९६३०५१२ बाट रकम भुक्तानी गरेको खुलाएका थिए ।
ऋषि धमलालाई पनि चन्दा
खड्काले अख्तियारमा दिएको बयानमा आफूले ऋषि धमलालाई पनि चन्दा दिएको बताएका
थिए । विभिन्न कार्यक्रम र प्रचारप्रसारका लागि आफूले धमलाई नविल बैंकको १७१००१७५०४८६२ नम्बरको खाताबाट चन्दा दिएका बताएका थिए ।
हाल खड्काको काठमाडौं विष्णु बूढानीलकण्ठ गा.वि.स. वडा नं. ७ ‘ग’ मा रोडशो रियलस्टेट प्रा.लि.ले निर्माण गरेको घर खरिद गर्नको लागि बैना स्वरूप रू. ८९,८९,०००।- भुक्तानी दिएकोरोडशो रियलस्टेट प्रा.लि. ले पत्रसहित उक्त रकम बराबरको Good For Payment चेक, उक्त चेकको रकम रू. ८९,८९,०००।- जफत समेत गरिएको थियो ।
अख्तियारले खड्काको आम्दानीको १८ करोड ६६ लाख रुपैयाँ स्रोत नखुलेको उनीविरुद्ध भ्रष्टाचार मुद्दा दायर गरेको थियो ।
त्यसपछि विशेष अदालतले उनलाई हाजिर हुन आउन म्याद पठाएको थियो ।
