काठमाडौँ । प्रमुख प्रतिपक्षी दल नेपाली कांग्रेसका सह–महामन्त्री डा. प्रकाशशरण महतले केपी शर्मा ओली नेतृत्वको सरकार ‘कुरामा नम्बर वान, काममा जिरो’ भएको आरोप लगाएका छन्।
शुक्रबार रिपोर्टर्स क्लब नेपालले गरेको साक्षात्कारमा बोल्दै नेता महतले एक वर्षमा सरकारले जनतालाई पूरै निराश बनाएको आरोप लगाएका हुन्। ‘सरकार कुनै पनि मोर्चामा सफल भएको छैन्’, उनले भने, ‘एक वर्षको समीक्षा गर्दा ‘कुरामा नम्बर वान, काममा जिरो’ को रुपमा देखिएको छ।’
उनले संस्थागत भ्रष्टाचार बढिरहेको पनि आरोप लगाए। ‘सुशासनको त कुरै नगरौं। सुनकाण्ड त्यो अब पृष्ठभूमिमा गैसक्यो। चिनीकाण्ड त्यस्तै। वाइडबडीकाण्ड अब अख्तियारले हेर्ने भनिएको छ’, उनले भने, ‘यी सबै विषयलाई हामी सूक्षम रुपमा हेरिरहेका छौँ ।’
महतले सरकारले सुशासन कायम गर्न नसकेको गम्भीर आरोप उनको छ। ‘समृद्धि त अहिले सत्तामा बस्नेका लागि मात्रै आएको होला’, उनले भने, ‘जनताले अहिलेसम्म समृद्धिको कुनै अनभूती गर्न पाएका छैनन्।’
