काठमाडौँ । चिनियाँ स्मार्टफोन निर्माता हुवावेले १ जिबीको चलचित्र १ सेकेन्डमा डाउनलोड गर्नसकिने फोल्ड गर्न मिल्ने स्मार्टफोन विश्व बजारमा ल्याएको छ। स्पेनको बार्सिलोनामा जारी वल्र्ड मोबाइल कंग्रेसमा विश्वको दोस्रो ठूलो स्मार्टफोन कम्पनी हुवावेले मेट एक्स मोबाइल फोन सार्वजनिक गरेको हो।
फाइभजी प्रविधि सपोर्ट गर्ने यो फोनको डिस्प्ले ८ इन्च रहेको छ। ११ एमएम मोटाइ भएको यो स्मार्टफोनको युरोपीयन बजारमा २ हजार ६ सय युरो तोकिएको छ।
किरिन ९८० प्रोसेसर भएको स्मार्टफोनमा ४५०० एमएच क्षमताको ब्याट्री रहेको छ। ५५ वाटका सुपर चार्जर भएको यो स्मार्टफोन ३० मिनेटमा ८५ प्रतिशत चार्ज हुने कम्पनीको दाबी छ।
स्मार्टफोनमा ८ जिबी र्याम भएको छ भने ५१२ जिबी मेमोरी छ।सामसुङले पनि एक हप्ता अगाडि यस्तै फोन बजारमा ल्याएको थियो ।
