काठमाडौँ । भरतपुर महानगरपालिकाका उपप्रमुख पार्वती शाह ठकुरीले महानगरप्रमुखमा रेणु दाहाललाई जिताएर नेपाली काँग्रेसले ठूलो गल्ती गरेको बताएकी छिन् ।
कार्यपालिका बैठक सञ्चालनमा आफूसँग समन्वय नगरेको भन्दै उनले भनिन्– रेणु दाहालले एकलौटी गर्छिन्, उनले कुनै पनि विषयमा परामर्श गर्दिनन्, संघीय सरकारको दुई तिहाईको मात उनलाई पनि चढेको देखिन्छ ।
उपप्रमुख ठकुरीले आज यहाँ पत्रकार सम्मेलन गरी आफूले जिम्मेवारी निर्वाह गर्दा आइपरेका समस्या र महानगरपालिकाको अवस्थाका बारेमा जानकारी गराइन । उनले भनिन्, “कार्यपालिका बैठकमा ल्याइने एजेण्डा एकलौटी तरिकाले ल्याउने गरिएको छ, समयमा जानकारीसमेत हुँदैन, एजेण्डामा कुनै विमति राख्दा ‘महानगर प्रमुखले चलाउने हो तपाईंले होइन’ जस्ता शब्द प्रयोग गर्ने गरिएको छ ।”
महानगरमा लेखा समिति गठन नगरी अनियमितता बढेको, जिन्सी समिति गठन नगरिएको, महत्वपूर्ण समिति एकलौटी ढङ्गले गठन गरेको, आस्था र विचारका आधारमा कर्मचारीलाई दुःख दिने काम गरिएको उनले अरोप लगाइन् ।
स्थानीय सरकार सञ्चालन ऐनमा प्राप्त उपप्रमुखको अधिकारलाई प्रयोग गर्न प्राविधिक तथा कर्मचारी महानगरले पर्याप्त नदिएको उपप्रमुख ठकुरीको गुनासो थियो । उनले रेणुकै कारण भरतपुर महानगरमा किचलो सुरु भएको आसय पनि व्यक्त गरिन् ।
