काठमाडौँ अन्तर्राष्ट्रिय क्रिकेट परिषद (आईसीसी)ले भारत र पाकिस्तानबीचको विश्वकप म्याचबारे कुनै अन्यौल नरहेको बताएको छ ।
आउँदो १६ जुनमा म्यान्चेस्टरमा हुने म्याच नहुने कुरा भारतीय मिडियामा आईरहेको बेला आईसीसी दुई देशबीच बढ्दो तनाव भएपनि खेलमा कुनै असर नगर्ने बताएको हो ।
भारतका कुनै जमानमा चम्केका खेलाडिहरुले पाकिस्तानसँगको खेल बहिष्कार गर्नुपर्ने माग गरेका थिए । तर, आईसीसीले भने खेल नरोकिने बताएको छ । ‘खेलकुद, खासगरी क्रिकेटले मानिसहरुलाई एक ठाउँमा ल्याउने र समुदायहरुलाई जोड्ने क्षमता राख्छ । विश्वकपका कुनै पनि खेलमा अहिलेसम्म कुनै द्विविधा उत्पन्न भएको छैन,’ आईसीसीको वक्तव्यमा भनिएको छ ।
तर, भारतीय क्रिकेट कप्तान बिराट कोहलीले पाकिस्तानसँग म्याच खेल्ने वा नखेल्ने विषयमा क्रिकेट बोर्ड र सरकारको निर्णय मान्ने बताएका छन् ।
विश्वकपमा अहिलेसम्म भारत पाकिस्तानसँग पराजित भएको छैन । भारतीय लिजेन्ड सचिन तेन्दुलकरले पाकिस्तानसँग नखेल्दा भारतले सम्भावित अंक गुमाउन सक्ने भन्दै ट्विट गरेका छन् ।
