काठमाडौं । झट्ट सुन्दा नेपालमा २५ रुपैयाँमै शुद्ध शाकाहारी खाना दिन्छ भनेर तपाई पत्याउनुहुन्छ ? अह पत्याउनुहुन्न । तर यो सत्य हो, भैरहवामा एकजना व्यवसायीले यस्तै अपत्यारिलो कामको शुरुवात गर्न लाग्नु भएको छ ।
पेशाले कन्स्ट्रक्सन इन्जिनियर रहनु भएका मारवाडी समुदायका रविकुमार रौनियारले आफ्नी स्वर्गीय आमा मायादेवीको सम्झनामा आउँदो बैशाखदेखि बिहानको एक छाक शुद्ध शाकाहारी खाना २५ रुपैयाँमै उपलब्ध गराउँनु हुने भएको छ ।
मायादेवी च्यारिटेबल फाउण्डेसन अन्तर्गत अन्नपूर्ण भोजनालयले बेशेषगरी सरकारी स्कूलका बिद्यार्थी, अस्पताल, धेरै मजदुरहरुले काम गर्ने स्थानहरुमा फाउण्डेसनले मिनी ट्रकमार्फत घुम्ती सेवा शुरु गरेर खाना खुवाउने रौनियारले बताउनुभयो ।
रणअम्बिका आँखा अस्पताल, भीम अस्पताल, युनिभर्सल मेडिकल कलेज, धेरै विद्यार्थी पढ्ने सरकारी स्कूलहरुमा यस्तो सेवा दिने उहाँको योजना रहेको छ।
