बैतडी । बैतडीमा पूजा गर्न हिँडेका दाजुभाईसहित तीन जनाको जिप दुर्घटनामा मृत्यु भएको छ।
देहीमाडौँबाट नागार्जुन जाँदै गरेको ग १ ज ४९२१ नं को जीप आज बिहान ११ः३० बजेतिर दशरथ चन्द नगरपालिका–११ नानीगाड भन्ने स्थानमा दुर्घटना हुँदा अन्य तीन जना घाइते भएका छन् ।
मृत्यु हुनेमा शरथचन्द नगरपालिका बाराकोटका अन्दाजी ६० बर्षीय हिराबल्लभ भट्ट र उनका भाई अन्दाजी ५३ वर्षीय लालमणि भट्टका साथै उनकै आफन्त अन्दाजी ५० वर्षीय नरुली भट्टरहेका छन् ।
दुर्घटनामा परी दशरथचन्द नगरपालिका–१० का अन्दाजी ४० वर्षका प्रकाश भट्ट, कञ्चनपुरको महेन्द्रनगर बस्ने अन्दाजी २६ वर्षीय राहुल भट्ट र जीप चालक दशरथचन्द नगरपालिका–१० का नवीन भट्ट घाइते भएका छन् ।
घाइते मध्ये प्रकाशको अवस्था गम्भीर रहेको जिल्ला अस्पताल बैतडीका मेडिकल अधिकृत डा. वसन्तराज जोशीले बताए। उनले भने ‘प्रकाश भट्टको अवस्था गम्भीर छ। हामीले रेफर गरिसकेका छौं। २ जनालाई पनि थप उपचारका लागि अन्यत्र लग्नै पर्छ।’
घटनास्थल अहिले प्रहरी नायब उपरीक्षक नेत्रमणि गिरी नेतृत्वको टोली पुगेको छ । जीप दुर्घटनाको कारण खुलेको छैन् । जीप सडकबाट १५० मिटर तल खसेको प्रहरीले जनाएको छ ।
