काठमाडौं । एकता नसकिदै नेपाल कम्युनिस्ट पार्टी (नेकपा) निकट मजदुर संगठनमा फुट देखिएको छ ।
पूर्वमाओवादी निकट मजदुब संगठन अखिल नेपाल ट्रेड युनियन महासंघले हालै भएको एकता प्रक्रिया नमान्ने बताएको छ ।
विधि, प्रक्रिया र पद्दतिविपरीत एकता गरिएको भन्दै गणेश रेग्मी नेतृत्वको महासंघले एकता नमान्ने चेतावनी दिएको हो ।
पूर्वएमाले र पूर्वमाओवादी निकट मदजुर संगठनबीच दुई दिनअघि मात्रै एकता घोषणा गर्दै संयोजकमा पूर्वएमालेबाट जिफन्ट अध्यक्ष विनोद श्रेष्ठ र पूर्वमाओवादीको ट्रेड युनियनका महासचिव जगत सिंखडालाई सह संयोजक बनाइएको थियो ।
एउटा संगठनका अध्यक्ष संयोजक हुँदा अर्को संगठनका अध्यक्ष सह–संयोजक हुने विधि तय गरिएपछि त्यसलाई तोडेको भन्दै रेग्मी समूह असन्तुष्ट बनेको हो ।
रेग्मी नेतृत्वको असन्तुष्ट समूहले नेकपा अध्यक्षद्वय केपी ओली र पुष्पकमल दाहाल प्रचण्डलाई भेटेर एकता प्रक्रियामा कमजोरी भएकाले नमान्ने भन्दै ज्ञापनपत्र बुझाएको छ ।
रेग्मीले पार्टीले तय गरेको एकतासम्बन्धी नीति र विधिविपरीत तथा मजदुरहरुको अहितमा रहेकाले स्वीकार गर्न नसकिने बताएको राजधानी दैनिकमा खबर प्रकाशित छ ।
