काठमाडौं । अख्तियार दुरुपयोग अनुसन्धान आयोगका प्रमुख आयुक्त नवीनकुमार घिमिरेले भ्रष्टाचारी, बिचौलिया र भूमाफिया कसैलाई पनि नछाडिने बताएका छन् । उनले यी तिनै पक्ष मुलुकको विकास र सुशासनका लागि अवरोधक भएकाले अख्तियारले उनीहरू माथि कठोर कदम चाल्ने चेतावनी दिएका हुन् । घिमिरेले मकवानपुरमा आयोजित कार्यक्रममा बोल्दै सरकारी जग्गामा भएको अनियमितताबारे आयोगले विशेष निगरानी गरिरहेको र छिट्टै कारबाही प्रक्रिया थालिने स्पष्ट पारे ।
प्रमुख आयुक्त घिमिरेले सार्वजनिक जग्गा हडप्ने र मिलिमतो गर्नेहरू सबैलाई अख्तियारले कारबाहीको दायरामा ल्याएरै छोड्ने प्रतिबद्धता व्यक्त गरे । बिचौलियाका कारण अनियमितताको ग्राफ बढ्न पुगेको तथ्य औंल्याउँदै उनले बिचौलिया माथि अख्तियार कडा रूपमा एक्सनमा उत्रने चेतावनी दिए । उनले बिचौलियाको प्रभाव बढ्दै जाँदा सेवाप्रवाह कमजोर भएको र कुशासन मौलाएकाले विकास निर्माणको कार्यले गति लिन नसकेको स्पष्ट पारे । यो समाचार आजको राजधानी दैनिकमा छ ।
