हेटौंडा । बीमा रकम प्राप्त गर्नका लागि आफ्नै पसलमा चोरी गरी स्थानीयवासीलाई झुक्याएको आरोपमा प्रहरीले घिमिरे इलेक्ट्रिक एण्ड इलेक्ट्रोनिक्सका सञ्चालक उमेश घिमिरेलाई पक्राउ गरेको छ ।
जिल्ला प्रहरी कार्यालय, मकवानपुरमा घिमिरेले गत जेठ ११ गते आफ्नो पसलमा चोरी भएको र पसलबाट रु तीन लाख १२ हजार नगदसहित रु ३२ लाख ९३ हजार २८४ मूल्य बराबरको इलेक्ट्रिक एण्ड इलेक्ट्रोनिक सामग्री हराएको भन्दै प्रहरीमा उजुरी दिएका थिए ।
तर, अनुसन्धानका क्रममा घिमिरेको दाबी पुष्टि हुने कुनै प्रमाण भेटिएन ।
प्रहरीका अनुसार ८ गते नै काठमाडौंबाट आएको भनिएको ३१ बोरा वाइरिङको तार चोरी भएको भनिए पनि डेलिभरी स्टकमा केही उल्लेख थिएन ।
उजुरीका आधारमा अनुसन्धान गर्दा पसल सञ्चालकमाथि नै शङ्का लागेपछि प्रहरीले उनलाई पक्राउ गरी आज सार्वजनिक गरेको हो ।
प्राविधिक पक्षबाट अनुसन्धान गर्दै जाँदा प्रहरीले हेटौंडाको पारिजात पथमा रहेको देवेन्द्र सापकोटाको घरमा रहेको कोठामा चोरी भएको भनिएको एलइडी बत्ती ११ कार्टुन, स्वीच ९ कार्टुन र सिलिङ पंखा ४ कार्टुन भेटिएको थियो । त्यहाँ घिमिरे आफैंले ती सामान लगेको देखिएको प्रहरीको भनाइ छ ।
अनुसन्धानका क्रममा घिमिरेले चोरी हुनु केही दिनअघि मात्र सिद्धार्थ इन्स्यूरेन्स लिमिटेडमा पसलको विमा गरिएको खुलेको थियो । जुन दाबी गर्नसमेत घिमिरेले चोरीको नाटक गरेको देखिएको प्रहरीले जनाएको छ ।
बैंकले रु ५० लाख ऋण तिर्नका लागि निरन्तर ताकेता गरेपछि उनले यस्तो योजना बनाएको खुल्न आएको प्रहरी नायब उपरीक्षक भट्टराईले बताए । उनलाई आजदेखि म्याद थप गरी थप अनुसन्धान गर्ने र कानूनबमोजिम कारवाहीको तयारीसमेत गर्ने प्रहरीको भनाइ छ ।
