काठमाडौं । इटालियन क्लब इन्टर मिलानको प्रशिक्षकमा एन्टोनिओ कोन्टे नियुक्त भएका छन् ।
इन्टरले लुसआनो स्पालेटीलाई बर्खास्त गरेपछि कोन्टेलाई नियुक्त गरिएको हो । स्पालेट्टीको समझौता २०२१ सम्म भएपनि इन्टरले उनलाई निरन्तरता दिएन। उनको प्रशिक्षणमा इन्टलर यस सिजन लिग चौथो स्थानमा सकाएको थियो भने च्याम्पियन्स लिगमा समूह चरणबाटै बाहिरिएको थियो।
फेरि इटली फर्किएका ४९ वर्षीय कोन्टे चेल्सीबाट बर्खास्त भएका थिए । सन् २०१६ अप्रलिमा चेल्सी पुगेका कोन्टे २०१८ जुलाईमा बर्खास्तीमा परेपछि उनी काम विहिन बनेका थिए।
उनले यसअघि इटलीमा एटलान्टा र युभेन्ट्सको प्रशिक्षण सम्हालिसकेका छन्। सन् २०११ देखि २०१३ सम्म उनकै प्रशिक्षणमा युभेन्ट्सले लगातार तीन पटक सिरी ए को उपाधि जितेको थियो।
त्यसपछि इटलीको प्रशिक्षक भएका उनी युरो कपपछि लण्डनको क्लबमा आए । उनले चेल्सीलाई प्रिमियर लिग र एफए कपको उपाधि दिलाएका थिए ।
